बागलुङ, ३० असोज – जिल्लाको गलकोट क्षेत्रमा हावाहुरी र भारी वर्षाका कारण धानबालीमा क्षति पुगेको छ । पाक्ने बेलाको धान ढलेपछि कृषकहरु चिन्तित बनेका छन् ।
केहि दिनदेखि पटक–पटक हावाहुरीसहित भारी वर्षा हुँदा अधिकाँश धान ढलेको छ । पाक्ने बेलामा धान ढलेपछि गेडा पुष्टिन नपाउने हुँदा उत्पादनमा समेत गिरावट आउने हटिया–८ का ईश्वर सुबेदीले बताए ।
अझै थप पानी परेमा धानको उत्पादनमा ठुलो असर गर्ने उनको भनाई छ । गलकोटमा धान खेती हुने गल्याङको फाँट, बेसीफाँट, मजुवाफाँट, ओखरबोट फाँट, बजेनीफाँट लगाएतका ठाउँमा लगाईएको स्थानिय ठुलो पहेले जातको धान बढि मात्रामा ढलेको छ ।
गलकोटमा ७ सय ४४ दशमलव ५ हेक्टर क्षेत्रफलमा धान खेती गरिएको कृषि सेवा केन्द्र हरिचौरले जनाएको छ । गलकोटमा गतवर्ष १ हजार ५ सय ७५ दशमलव ८७ मेट्रिक टन धान उत्पादन भएको थियो । अहिले भने धान उत्पादनमा भारी गिरावट आउने अनुमान गरिएको छ ।
त्यस क्षेत्रमा कृषकहरुले स्थानिय जातका जौ धान, भट्टे धान, ठूलो पँहेले, सानो पहेले, गौरिया, रेशली जातका धान खेती गर्ने गरेका छन् ।
