पूर्वप्रधानमन्त्री ओलीले राष्ट्रपति भण्डारीबाट टीका लगाए, प्रचण्डले दसैं मनाए, देउवाले टीका लगाएनन्

पूर्वप्रधानमन्त्री केपी ओलीले राष्ट्रपति भण्डारीबाट टीका लगाए
पूर्वप्रधानमन्त्री केपी शर्मा ओलीसहित विशिष्ट व्यक्तित्वले राष्ट्रपति विद्यादेवी भण्डारीको हातबाट दसैंको टीका लगाएका छन् । राष्ट्रपति भण्डारीले प्रधानन्यायाधीश सुशीला कार्की, पूर्वप्रधानमन्त्री एवम् एमाले अध्यक्ष केपी शर्मा ओली, पूर्वमन्त्री, सांसद, सुरक्षा निकायका प्रमुखलगायतलाई टीका लगाइदिएको राष्ट्रपतिका प्रेस सल्लाहकार माधव शर्माले जानकारी दिए ।
राष्ट्रपति भण्डारीले दिउँसो २ बजेपछि शीतल निवास पुगेका सर्वसाधारणलाई वडा दसैँको अवसरमा टीका लगाइदिएकी छिन् । यसअघि बिहान ८ बजेर ४५ मिनेटको शुभसाइतमा राष्ट्रपति भण्डारीले हनुमानढोका दरबारका मूल पुजारी देवराज अर्यालबाट टीका तथा जमरा ग्रहण गरेकी थिइन् । राष्ट्रपतिले परिवार र आफन्तजनलाई पनि सोही साइतमा टीका लगाइदिएकी छिन् ।
टीका नलगाई पारिवारिक जमघटमा प्रधानमन्त्री प्रचण्डले दसैं मनाए
प्रधानमन्त्री पुष्पकमल दाहाल ‘प्रचण्ड’ले वडा दसैँ टीका नलगाई पारिवारिक जमघटका साथ मनाएका छन् । दिनभर बालुवाटारमा बसेका प्रधानमन्त्रीले परिवारका सदस्यसँग बसेर दसैं मनाएका हुन् । ‘प्रधानमन्त्री प्रचण्डले टीका नलगाई आफन्तसँग भेटघाट गरेर दसैं मनाएको उनका उपस्वकीय सचिव पूर्ण कार्कीले जानकारी दिए ।
‘प्रधानमन्त्रीले आफू पनि टीका लगाउनुभएन र अरुलाई पनि लगाइदिनुभएन्’, कार्कीले भने, ‘सामान्य ढंगले परिवारका सदस्यसँग बसेर दसैं मनाउनुभएको छ ।’  दसैंको टीकाको दिन प्रचण्डका आफन्त प्रायः सबै बालुवाटार पुगेका थिए । पारिवारिक भेटघाट सँगै प्रधानमन्त्री प्रचण्डले दसैंको टीकाको दिन पुस्तक पढेर बिताएका छन् । ‘युद्ध सम्बन्धी कुनै पुस्तक पढ्नुभयो तर यकिन यही भन्ने छैन,’ कार्कीले  भने ।
शेरबहादुर देउवा शोकमा भएकाले टीका लगाएनन्
नेपाली कांग्रेसका सभापति शेरबहादुर देउवाले यस वर्ष दसैंको टीका लगाएनन् । पूर्वप्रधानमन्त्री समेत रहेका देउवाले शोकका कारण टीका नलगाएका हुन् । देउवाका भतिजोको निधनका कारण टीका रोकिएको हो उनका सहयोगी भानु देउवाले जानकारी दिए । टीका नलगाए पनि पूर्वप्रधानमन्त्री समेत रहेका देउवाले दसैंलाई धार्मिक तथा सांस्कृतिक पर्व सँगै अन्यायमाथिको न्यायको पूर्वका रुपमा समेत सम्झना गरेका छन् ।
‘दशमी हाम्रो एक धार्मिक र सांस्कृतिक पर्व हो’ उनको शुभकामनामा भनिएको छ, ‘अन्यायमाथि न्यायको तथा असत्यमाथि सत्यको विजयको शाश्वत सन्देश दिने यो पर्वलाई नेपाली समाजले हरेक वर्ष पारिवारिक स्नेह, सामाजिक सद्भाव, आपसी सहयोग र पारस्परिक एकताको रुपमा मनाउँदै आएको छ ।’
देउवाले यस्ता पर्वले नेपालीलाई एकताबद्ध गर्ने उल्लेख गर्दै विविधता बीचको एकता नै नेपालीको परिचय भएको उल्लेख गरेका छन् । ‘नेपाल बहुजातीय, बहुधार्मिक, बहुसांस्कृतिक, बहुभाषिक राष्ट्र हो । मौलिक भेषभूषा सहितका यिनै विविधता हाम्रो राष्ट्रिय पहिचान बनेका छन् । हामीमा निहित बन्धुत्व भावले विविधता बीचमा पनि अनुपम एकता कायम गरेको छ,’ शुभकामना सन्देशमा भनिएको छ, ‘विविधता बीचको एकता नेपालीको विशेषताको रुपमा परिचायक पनि हो । विजया दशमीले पनि हामी बीचको एकतालाई अझ मजबूत बनाएको छ ।’