पञ्चकोट महायज्ञको खर्च सार्वजनिक

बागलुङ, ९ जेठ– गत फागुनमा विश्व शान्ति सर्वसिद्धिधाम पञ्चकोटमा भएको महायज्ञको मंगलवार खर्च सार्वजनिक गरिएको छ । महायज्ञमा कुल ४२ लाख ९३ हजार ३ सय ६८ रुपैयाँको कारोवार भएको पञ्चकोट व्यवस्थापन समितिका महासचिव माधवप्रसाद उपाध्यायले बताए । पञ्चकोटमा आयोजित सरोकारवाला सहितको भेलामा उनले बिषयगत खर्च सार्वजनिक गरेका हुन् । जसअनुसार नगदी रसिद तथा संस्थापक सदस्यहरुबाट प्राप्त २१ लाख ४० हजार २ सय ८२ रुपैयाँ छ ।
त्यस्तै मण्डप तथा दानपेटिकाबाट २ ला १४ हजार, तुलादानबाट ७७ हजार ८ सय, यज्ञ अवधिमा धान बिक्रीबाट ६५ हजार ९ सय, रासको धान बिक्रीबाट २ लाख ९८ हजार ५ सय ९०, चालम विक्रिबाट १ लाख १६ हजार ८ सय संकलन भएको हो । उक्त कार्यबाट २९ लाख १३ हजार ४ सय ९२बस् संकलन भएकोमा बागदान स्वरुप बोलेकोबाट १३ लाख ७९ हजार रुपैयाँ उठ्न बाँकी रहेको छ । त्यस्तै खर्चतर्फ यातायात, संचार र प्रचारप्रसारका सामाग्रीमा २ लाख ८१ हजार, टहरा, मंच, यज्ञ, मण्डप र टेन्टका लागि ७५ हजार, खाद्यान्न र भाँडावर्तनमा २ लाख ५२ हजार, विद्युत तथा साउण्ड सिस्टममा १ लाख १६ हजार, ब्राम्हण दक्षिणा र व्यवस्थापनमा ३ लाख ८० हजार, पञ्चेबाजामा ७० हजारसमेत खर्च भएको हो । पञ्चकोटलाई धार्मिक तथा पर्यटकीय गन्तव्य बनाउनका लागि बृहत योजनासहित चार बर्षअघि देखि लगातार महायज्ञ संचालन गर्दै आइएको छ । यो बर्षको महायज्ञ फागुनको ९ गतेदेखि १५ गतेसम्म संचालन गरिएको थियो ।
यसअघिका महायज्ञमा उठेको रकम र स्थानीय बासिन्दा तथा सरकारी निकायबाट प्राप्त रकमबाट झण्डै १७ करोड रुपैयाँका संरचना तयार भैसकेका छन् । हनुमानको मुर्ति स्थापना गरिएको छभने कालीगण्डकीको मन्दिर, गरुड शिला, सिसा महल, गणेश मन्दिर जस्ता संरचना तयार भैसकेका छन् । संसारकै अग्लो १ सय ८ फिट अग्लो कलस बनाउनका लागि विस्तृत योजना प्रतिवेदन डिपिआर बनाउने काम भैरहेको छ । आगामी असार मसान्त सम्ममा बन्ने डिपिआरको आधारमा कलस बनाइनेछ ।
पञ्चकोटलाई धार्मिक गन्तव्य बनाउनका लागि सडक संजालले पनि दुइ तर्फबाट जोडिएको छ । ती सडकलाई स्तरउन्नती गर्नुपर्ने, पञ्चकोट भित्रका कारिकोट हुँदै संसारकोट सम्मको सडक स्तरोन्नती गर्दै ती स्थानका सबै संरचनाको सुधारगर्ने समेत योजना छ । तोकिएका सूचक र परियोजनाको काम पुरा भएमा नेपालकै नमूना र उत्कृष्ठ गन्तव्य बन्ने स्थानीयले बताएका छन् । खर्च सार्वजनिक कार्यक्रममा बोल्दै प्रतिनिधि अध्यक्ष स्वामी प्रपन्नाचार्यले वृहत योजनासहित अगाडि बढेकोले तोकिएको समयमा काम पुराभन्दा सबै काम पूर्ण रुपमा सफल बनाउने बिषयमा बढी केन्द्रीत भएको बताए । साथै उनले राज्यका निकाय, गैरसरकारी संस्था र घुम्न आउने समेतको सहयोगबाट यो सफलता मिलेको उनले बताए । कलस निर्माणका लागि भन्दै महायज्ञमा बागलुङ नगर प्रमुख जनकराज पौडेलले एक करोड सहयोगको घोषणा गरेका थिए । उक्त घोषणामध्ये चालु बर्षका लागि कम्तिमा ५० लाख खर्च गर्ने गरी बजेट प्राप्त हुने भएकोले पूर्वाधारमा खर्चिने उनले जानकारी दिए । त्यस्तै पहिलो बर्षको महायज्ञमा बोल कबोल गरेका अजयराज सुमार्गीले एक करोड २५ लाख रुपैयाँ उपलब्ध गराएको प्रपन्नाचार्यले बताए । कार्यक्रममा बानपा ५ का वडा अध्यक्ष खेमराज सापकोटाको स्वागत र नारायण गौतमको संचालनमा सम्पन्न भएको थियो ।