ओली सरकार लम्पसारवादी–कांग्रेस नेता पौडेल

बागलुङ, ६ जेठ– नेपाली कांग्रेसका केन्द्रीय सदस्य प्रदिप पौडेलले नेपाली सेनाको अविस्वास गर्दै भारतीय सेना भित्राउन दिने ओली सरकार ‘लम्पसारबादी’ भएको आरोप लगाएका छन् । पौडेलले विश्वका सबै द्वन्द्वग्रस्त मुलुकमा पुगेर शान्ति सेनाको भूमिका निभाउन सक्ने सेनालाई अविस्वास गर्दै भारतीय प्रधानमन्त्रीलाई भारतकै सेनाको जथ्था ल्याएर सुरक्षा दिन खोज्नु प्रधानमन्त्रीको ‘लम्पसारबादी चरित्र’ भएको आरोप लगाए । नेपाल तरुण दलले आयोजना गरेको जिल्ला स्तरीय प्रशिक्षण कार्यक्रममा बोल्दै पौडेलले नेपाली सेनामाथि अविश्वास गर्नेहरु कसरी राष्ट्रबादी हुन सक्छन् भन्दै प्रश्न समेत तेर्साए ।
भारतीय प्रधानमन्त्रीको नेपाल भ्रमणको मिति तोक्ने, सेना ल्याउने, राष्ट्रिय झण्डा मिलाउन भारतलाईनै अनुमति दिने जस्ता कामले वर्तमान सरकारको चरित्र उधांगो भएको पौडेलको टिप्पणी छ । ‘कांग्रेसले यी काम गरेको भए अहिले सडकमा आगो बलिसक्ने थियो’ पौडेलले भने, ‘कांग्रेस कार्यकर्ताले अब यस्ता बिषयमा भण्डाफोर अभियान चलाउनुपर्छ ।’ उनले अरुण तेस्रो जलविद्युत परियोजनामा नेपाली जनतालाई २५ बर्ष झुलाएको पनि आरोप लगाए । २०५१ सालमै बन्ने आयोजना बन्न नदिएको पार्टीले अहिले नेपालीको अस्तित्व गुम्ने गरी सम्झौता गरेको पौडेलको आरोप छ ।
उनका अनुसार, ८० प्रतिशत एशियाली बिकास बैंकको सहयोग र २० प्रतिशत नेपाली लगानीमा बन्न लागेको परियोजना रोकेर भारतको सतलज कंपनीलाई मनपरी गर्न दिइएको पौडेलको तर्क छ । सम्झौता अनुसार ८० प्रतिशत बिजुली कंपनीले लैजाने र २० प्रतिशत नेपालीलाई दिने सम्झौतामा हस्ताक्षर भएको उनले प्रष्ट पारे । तरुण दलले प्रशिक्षीत तरुण, अनुशासित तरुण र संगठित तरुण भन्ने नारा सहित प्रशिक्षण आयोजना गरेको हो । झण्डै ३ सय जना सहभागि भएको प्रशिक्षणमा पौडेलले पार्टीको वर्तमान अवस्था र भावि कार्यदिशा बारे जानकारी गराएको सहभागिले बताए ।
उक्त अवसरमा कांग्रेस जिल्ला सभापति दिपेन्द्रबहादुर थापा, पूर्व सभापतिहरु हरिप्रसाद श्रेष्ठ, प्रकाश पौडेल, सांसद मणीभद्र शर्मा, कोपिला बोहोरा, महासमिति सदस्य भीम श्रीष, नेविसंघका केन्द्रीय उपाध्यक्ष डिल्लीराम सुवेदी लगायतले बोलेका थिए । तरुणदल बागलुङका अध्यक्ष उमाकान्त शर्मा बाबुको अध्यक्षता, सहसचिव सिताराम रसाईलीको संचालन र उपाध्यक्ष कृष्ण शर्माको स्वागतमा कार्यक्रम सम्पन्न भएको थियो । तरुणदलले देशभरीनै प्रशिक्षण कार्यक्रम संचालन गरिरहेको बताइएको छ । स्थानीय, प्रदेश र प्रतिनिधिसभाको निर्वाचनमा कांग्रेसले हार व्योहरेपछि तत्कालिन र दिर्घकालिन योजना बनाउने, संगठन बिस्तार अभियान संचालन गर्ने तथा आगामी निर्वाचनमा कांग्रेसलाई पुन पहिलो पार्टी बनाउने अभियान सहित जिल्ला स्तरीय र सबै गाउँपालिका, नगरपालिका र वडा तहमा प्रशिक्षण संचालन गर्दै संगठन निर्माण अभियान थालिने अध्यक्ष शर्माले जानकारी दिए । कांग्रेसले पनि बिद्यार्थी र तरुणदललाई परिचालन गरेर संगठन बिस्तारको काम थाल्ने योजना बनाएको थापाको भनाई थियो । थापाले बिगतको पाठबाट सिकेर अव खाडलबाट माथि उठ्ने तयारी भएको बताए ।