बागलुङ नगरपालिकाका नाममा उच्च अदालतको परमादेश

बागलुङ, ४ जेठ– लामो समयदेखि विवादित बानपा–४ कुँडुलेको छापको खानेपानीका बिषयमा उच्च अदालत पोखरा बागलुङ इजलासले बागलुङ नगरपालिकाका नाममा परमादेश जारी गरेको छ । स्थानिय केही व्यक्तिहरुले बागलुङ नगरपालिका, वडा नं ४ र ५ का वडा कार्यालय तथा खानेपानी उपभोक्ता समितीका केही पदाधिकारीको बिरुद्धमा उच्च अदालत पोखारा बागलुङ इजलासमा दर्ता भएको रिट उपर फैसला गर्दै नगरपालिकाका नाममा परमादेश जारी गरेको हो ।
अदालतले बिहिबार पत्रकार सम्मेलन गर्दै फैसला सार्वजनिक गरेको छ । बानपा ४ का लक्ष्मण पौेल, ध्रुवलाल सापकोटा, माधब प्रसाद उपाध्याय, ओमनाथ सापकोटा र होमनाथ सापकोटाले दायर गरेको रिट उपर फैसला गर्दै अदालतले नगरपालिकाले नगर प्रमुखको रोहवरमा २०७४ साल पौष १६ गते गरेको सहमति पत्रलाई कार्यान्वयन गर्नु भनि नगरपालिकाका नाममा परमादेश जारी गरेको हो । गत बैशाख ४ गते बसेको न्यायाधिशद्वय शेषराज सिवाकोटी र हरिप्रसाद पौडेलको संयुक्त इजलाशले बानपा ४ छाप र बनापा ५ बान्द्रेका उपभोक्तालाई सहज एवं न्यायपुर्ण व्यवस्थापन गरि भुतेछहराको खानेपानी मुहानलाई संरक्षण गर्ने व्यवस्था मिलाउन भनिएको छ । त्यस्तै भुतेछहरामा रहेका जग्गावालालाई खानेपानी इन्टेक निर्माणमा प्रयोग गर्दा उचित क्षतिपुर्ति दिालउन समेत भनिएको छ ।
खानेपानीको समस्यालाई समाधान गर्नका लागि वडा नम्बर ४ छापका स्थानिय लाई २५ एमएमको पाईपमा पानि दिने र वडा नम्बर ५ बान्द्रका उपभोक्तालाई १६ एमएमको पाईपमा पानी उपलव्ध गराउन अलादतले आदेश दिएको छ । वडा नम्बर ४ का सबै उपभोक्तालाई एक घर एक धारा खानेपानी योजना सुरु गर्न र मुलको पानीलाई जग्गाधनी तथा सारेकारवाला सबैले सार्वजनिक रुपमा प्रयोग गर्न पाउने व्यवस्था मिलाउन समेत आदेशमा भनिएको छ ।
समय नतोकी नगरपालिकाका नाममा गरिएको परमादेश तत्काल कार्यान्वयन गर्न अदालतले आग्रह गरेको छ । नगरपालिकाको न्यायीक समितीले पहिलो मुद्धाको रुपमा उक्त खानेपानी बिबादको समाधान गर्न फैसला गरेको थियो । अदालतले पनि न्ययीक समितीको निर्णयको कदर गर्दै फैसला गरेको छ ।