बागलुङबाट पोखरा जाँदै गरेको बस दुर्घटना, १५ जना घाइते

सन्तोष थापा
पर्वत,२८ बैशाख –पर्वतको कुश्मा नगरपालिका ७ दोविल्लामा शुक्रबार विहान १२ बजे यात्रुबहाक बस दुर्घटना भएको छ । दुर्घटनामा परी बसमा सवार २५ जना यात्रु मध्ये १५ जना यात्रु घाइते भएका छन् । बागलुङदेखि पोखरा तर्फ जाँदै गरेको ना ३ ख ७७४० नम्बरको यात्रुबहाक बस पोखरा बागलुङ राजमार्गको दोविल्ला खण्डमा दुर्घटना भएको थियो । उक्त दुर्घटनामा परी घाइते हुनेहरुमा अधिकांश बागलुङको जैमिनी नगरपालिका र बागलुङ नगरपालिकाका यात्रुहरु रहेका छन् भने कास्की, तनहुँ, पर्वत लगायतका यात्रुपनि सामान्य घाइते भएको जिल्ला प्रहरी कार्यालय पर्वतले जनाएको छ ।घाईते हुनेहरुमा बागलुङ नगरपालिका १० का सन्तु थापा, बनपा ४ का दिपा थापा, बानपा २ का सेर बहादुर कुँवर, जैमिनी नगरपालीका ७ का टिका देवी केसी, जैमिनी १ का बलबहादुर थापा, जैमिनी ७ का रिता राना र जालीका राना, कुश्मा नगरपालिका ४ का दिलिप यादव, कुनपा १० का लक्ष्मी पैडेल र पावर्ति पाध्यानी, कुनपा ५ का कल्पना सुनार, कुनपा ६ का कृति सुनार रहेका छन् । त्यस्तै बसमा सवार तनहुँका मदन थापार सुर्खेतका हरीकला श्रीष घाईते भएको जिल्ला प्रहरी कार्यालय पर्वतका प्रहरी हवल्दार ख्याम प्रसाद रिजालले बताए ।
घाइते सवैजनाको घटनास्थलबाट उद्धार गरी पर्वत जिल्ला अस्पतालमा उपचार भइरहेको छ । घाइतेहरुको टाउको, खुट्टा र शरिरका विभिन्न भागमा चोट लागेपनि खासै गम्भिर नरहेको पर्वत जिल्ला अस्पतालले जनाएको छ ।
सडकमा विपरित दिशाबाट आइरहेको ट्याक्सीलाई उछिन्न खोज्दा दुर्घटना भएको जिल्ला ट्राफिक कार्यालय पर्वतले जनाएको छ । बस सडकबाट करिव २० मिटर तल खसेको छ । बसका चालक फरार रहेको र खोजिकार्य भइरहेको प्रहरीले जनाएको छ ।