‘जनताको समृद्वि पहिलो प्राथमिकता’

बागलुङ, २१ असोज – नयाँ शक्ति पार्टी नेपालका संगठन विभाग प्रमुख देवेन्द्र पौडेलले राष्ट्र र जनतालाई समृद्धितर्फ लैजाने अभियानका लागि पार्टीको तर्फबाट आलोचनात्मक सुझाव माग गरेका छन् । पार्टीले सुशासन, लगानी वृद्धि, रोजगारी सिर्जना र विकासबाट राष्ट्रको समृद्धि चाहेकोले उक्त मापदण्डमा रहेर काम गर्ने सुझाव आवस्यक परेको बताए । बिहिबार बिहान पत्रकारहरुको अनौपचारिक भेटमा हरेक जनताको समृद्धिलाई पहिलो प्राथमिकतामा राखेर आमुल परिवर्तन गर्न चाहेको धारणा राखेका हुन् । राजनीतिक रुपमा संविधान खारेजी र पुर्नलेखन हुन नसक्ने भन्दै उनले आवस्यक संशोधन गरेरै जानुपर्ने पार्टीको धारणा राखे । त्यस्तै भारत र चीनसंग समदुरी र समान कुटनीतिक सम्बन्ध स्थापित गर्ने तथा ठूला लगानी उनीहरुबाटै भित्राउने वातावरण बनाउन जरुरी रहेको पनि बताए । ‘भारत र चीनसँग पैठेजोरी खेलेर हाम्रो समृद्धि संभव छैन’ उनले भने, ‘कुटनीतिक समदुरीबाट उनीहरुको सहयोग लिन सकेमा हाम्रो विकास संभव छ ।’ नेपाली जनताले सक्नेजती लगानी जम्मा गरेर ठूला सहयोग भने विदेशबाटै लिनुपर्ने पार्टीको धारणा पनि राखे । वर्तमान सत्ता गठबन्धन र प्रतिपक्ष जस्तो कांग्रेस र कम्प्युनिष्ट भएर नभई विकासबादी शक्तिको रुपमा पार्टी आएको उनले बताए । ‘पृथ्वीलाई नेतृत्व गर्ने शक्ति हाम्रा छिमेकी छन्, हामी आर्थिक रुपमा कमजोर भएका छौं’ उनले भने, ‘उनीहरुलाई प्रयोग गरेर हाम्रो विकास बढाउनुपर्छ ।’ केही बर्षमा राज्य सत्तामा समेत पुग्ने लक्ष राखेको नयाँ शक्तिले कुनैपनि दललाई आग्रह र पूर्वाग्रह नराख्ने धारणा राखे । देशमा राजनीतिक परिवर्तन भैसकेकोले अबका दिनमा पुरानै शैलीले अगाडि बढ्न नसकिने पनि धारणा राखे । ‘अब दलहरुले कोर्स र राजनीतिक कार्यशैली फेर्नुपर्छ’ पौडेलले भने, ‘हामीले जान्यौं, रिक्स मोल्यौं वा आँट्यौं यसको लागि सुझाव आवस्यक परेको छ ।’ अर्को प्रसंगमा उनले संविधान कार्यान्वयनलाई जटिल बनाउनुभन्दा राजनीतिक सहमतिमा जानु उपयुक्त भएको पनि धारणा राखे । हिन्दु राज्यबारे आएका धारणालाइ विर्सनु उपयुक्त हुने तर अन्य बिषयमा जनताको मत अनुसारनै जान आवस्यक हुने उनको धारणा थियो । पार्टीको संगठन विस्तार अभियानमा उनी बुधवार बागलुङ आएका थिए ।