कडाई भरेर व्यवसायिक बन्दै

बागलुङ, २१ असोज – काम भन्ने कुरा कुनै सानो र ठूलो हुँदैन भन्ने उदाहरण यहाँका केही महिलाहरुले देखाएका छन् ।
घरको काम भ्याएर उनीहरुले कडाइ भरेर मासिक १५ देखि २० हजार रुपैयाँ सम्म कमाउन सफल भएका छन् । कोही प्रशिक्षकको रुपमा अन्य महिलालाइ सिकाउने काम गर्छन् भने कोही सिक्दै काम गर्दै छन् । काम सिकेकाहरु केहीले घरैमा बसेर त केही प्रशिक्षक बनेर गाउँ–गाउँमा पुगेर पनि कमाइ गर्ने भएका छन् ।
यस्तै काम गरेर मनग्ये आम्दानी गर्नेमा बानपा ३ पुरानो सिनेमा रोडमा कडाइ भर्ने काम गर्ने यमुना थापा हुन् । उनी जस्ता दर्जनौ महिलाले अहिले मासिक राम्रो कमाइ गरेर देखाउन सक्ने भएका छन् । उनीहरुको डेरा र पसलमा हरेक महिना १० देखि १५ जना महिलाहरु सिप सिक्न आउँछन् । बुटिकमा पच्छ्यौरा, शल, साडी लगायतका कपडा तयार गरेर विक्रि गर्छन् । दिउसो पसलमा बसेर मेहेनत गर्दा २ दिनमा एउटा पच्छ्यौरा बनाइ सक्ने उनले बताइन् ।
घरको दैनिकी भ्याएर गरेको कामले पनि उनीहरलाइ व्यवसायिक बनाइसकेको छ । दुइछोरा पढ्न गएपछि सुतेर वित्ने दिनहरु उनले सिर्जनामा बिताउन थालेकी हुन् । पच्छ्रयौरा, ब्लाउज, कुर्ता लगायतमा बुटिक भरेर विक्रिगर्दा उनले श्रीमानको कमाइ बिना घरखर्च चलाउन सकेको बताइन् । ‘कामले धेरै मानिस सँग चिन्ने मौका पनि दिएको छ’ थापाले भनिन्, ‘हरेक दिन श्रीमानसँग खर्च मागिरहने झन्झट पनि हटेको छ ।’ उनलाइ यो पेशाले आत्मनिर्भर र स्वतन्त्र भएको महसुस भएको छ ।
सुरुसुरुमा श्रीमान, छिमेकीले के भन्लान भन्ने सोचेकी थापा आफ्नै कमाइले पनि बाँच्ने आधार बन्ने रहेछ भन्ने बुझ्न थालेको बताइन् । लालीगुराँस चोक, गुठी लगायतका स्थानमा सबेर बागलुङ बजारमा मात्र झण्डै ५० महिला यो पेशामा लागिरहेका छन् । बुट्टा मन पराएर बागलुङ लगायत पर्वत र म्याग्दीदेखि पनि खरिदका लागि यहाँ आउने गर्छन् । ‘गाउँ–गाउँका महिलाहरुले बढी किनेर लान थालेका छन्’ थापाले भनिन्, ‘चाडपर्व, विवाहको समय मेरो व्यपार बढ्ने गरेको छ ।’ ३ सय रुपैयाँको पच्छ्यौरामा दुइ दिन लगाएर सितारा भरेपछि १ हजार देखि १ हजार २ सय सम्म विक्रि हुने गर्छ । उद्यमी महिलालाइ संगम तालिम तथा परामर्श केन्द्रले तालिम र बुटिक तान सहयोग गरेको थियो । पछिल्लो समय भने संगमले आधुनिक मेसिन समेत दिएपछि उत्पादन अझै बढेको कार्यक्रम संयोजक अनिता तिवारीले बताइन् ।
उद्यमीहरुले अहिले सम्म एक महिना सम्मका तालिम लिइसकेका छन् । आधुनिक डिजाइन बारे थाहा पाएपछि उनीहरुको क्षमता र आम्दानी बढेको हो । यो कामले व्यवसायिक बनाएको भकुण्डेकी शुसिला थापा बताइन् । ‘छोराछोरी पढाउन बसेकालाइ यो पेशा उपयोगी रहेछ’ उनले भनिन्, ‘चाडपर्वमा धेरै काम आउने भएकोले मनग्ये कमाइ हुन्छ ।’ रायडाँडाकी पार्वती थापाले पनि यो पेशाले व्यवसायीक बनाएकोमा खुसी व्यक्त गरिन् । यो पेशामा लाग्ने महिलाले श्रीमानको आस गर्न नपरेको र सहज रुपमा घरखर्च चलेको बताए ।