बागलुङमा प्रहरी दिवस मनाईयो

बागलुङ, २१ असोज – ६१ औं नेपाल प्रहरी दिवस २०७३ को अवसरमा बिहीबार अञ्चल प्रहरी कार्यालय धौलागिरीको आयोजनामा श्रद्धाञ्जली समारोह सम्पन्न भएको छ ।
दिवसका अवसरमा देश र राष्ट्रका लागि रगत बगाएका विर अमर प्रहरीहरुको उच्च मुल्याङ्कनसहित श्रद्धाञ्जली समारोह गरिएको अञ्चल प्रहरी कार्यालय धौलागिरीले जानकारी दियो ।
कार्यक्रममा बोल्दै प्रमुख जिल्ला अधिकारी भागीरथ पाण्डेले नेपाल प्रहरीले ल्याएका नयाँ–नयाँ कार्यक्रमले प्रहरी नेपाली जनताको साथी तथा सुरक्षाको भरोसा बन्न सफल बनेको बताए ।
पाण्डेले नेपाली जनताको सुरक्षाको भरोसा बन्नको लागि प्रहरीहरुले गरेको योगदानलाई कोहीले पनि भुल्न नहुने बताए । ‘प्रहरीले घामपानी केही नभनी जनताको लागि दिनरात काम गरिरहेका छन्’ प्रजिअ पाण्डेले भने । कार्यक्रममा बोल्दै अञ्चल प्रहरी कार्यालय धौलागिरीका प्रमुख प्रहरी वरिष्ठ उपरिक्षक छविलाल जोशीले देश र जनताको लागि प्रहरीहरु सधै दत्तचित्त भएर लाग्नुपर्ने बताएका थिए ।
प्रहरी वरिष्ठ उपरिक्षक छविलाल जोशीको अध्यक्षतामा सम्पन्न भएको उक्त कार्यक्रममा स्वागत प्रहरी निरिक्षक सूर्यकान्त पण्डित र संचालन प्रहरी नायव निरिक्षक दामोदर भट्टराईले गरेका थिए ।
उक्त कार्यक्रममा दिवसको अवसरमा सम्पन्न भएको भलिवल र व्याटमिन्टन प्रतियोगिताका विजेताहरुलाई पुरस्कार वितरण गरिएको थियो ।