यातायात व्यवसायी द्धारा यातायात व्यवस्था कार्यालय घेराउ

बागलुङ, १७ बैशाख– राष्ट्रिय यातायात महासंघको संघर्षका कार्यक्रम अन्र्तगतको शान्तिपुर्ण यातायात कार्यालय घेराउ कार्यक्रमलाई सघाउँदै आईतबार धौलागिरीका यातायात व्यवसायीहरु बागलुङस्थित यातायात व्यवस्था कार्यालय डेढ घण्टा घेराउ गरेका छन् । बस व्यबसायी, जिप व्यवसायी र ट्याक्सी समिती र यातायात व्यवसायसँग सम्बन्धित मजदुरहरु समेतको टोलीले कार्यालय घेराउ गरेको हो । बिहान १० बजेदेखी १ः३० सम्म बागलुङस्थित धौलागिरी यातायात व्यवस्था कार्यालय घेराउ गरिएको धौलागिरी जिप व्यवसायी समितीका अध्यक्ष बिष्णु अधिकारीले बताए ।
सिन्डिकेटको बहानामा राज्यले यातायात व्यवसायमा हस्तक्षेप गरेको भन्दै सरकारको हस्तक्षेपविरुद्ध राष्ट्रव्यापी संघर्षका कार्यक्रम गर्न लागिएको अधिकारीले बताए । सरकारले यातायात क्षेत्रमा रहेको सिन्डिकेट खारेज गरेपछि राष्ट्रिय यातायात महासंघले चरणबद्ध संघर्षका कार्यक्रम सार्वजनिक गरेको छ । कार्यक्रम अन्र्तगत आईतबार यातायात व्यवस्था कार्यालय घेराउ गरेका व्यवसायीले सोमबारदेखी बुधबारसम्म प्रचार–प्रसार गर्ने, बिहिबार आ–आफ्ना गाडी घरमा थन्काउने, शुक्रबार संयुक्त संघर्ष समितीको बैठक बसि थप संघर्षका कार्यक्रम सार्वजनिक गर्ने जनाएको छ ।
आईतबारको कार्यालय घेराउबाट कुनैपनि काम भने नरोकीएको धौलागिरी यातायात व्यवस्था कार्यालयले जनाएको छ । व्यवसायीले शान्तिपुर्ण रुपमा गेट बाहिरबाट कार्यालय घेराउ गरेको भएपनि कार्यालय भित्रका सबै काम सुचारु भएको कार्यालय प्रमुख राजेन्द्र प्रसाद घिमिरेले बताए ।