‘संविधान कार्यान्वयन गर्नु दलिय दायित्व’

बालकृष्ण सुवेदी
बागलुङ, २० असोज – नेपाली कांग्रेसका नेता तथा सहरी विकास मन्त्री अर्जुननसिंह केसीले संघर्षबाट नेपाली जनताले प्राप्त गरेको उपलब्धीको रक्षा र संविधान कार्यान्वयन राजनीतिक दलको प्रमुख दायित्व भएको बताएका छन् । बागलुङ उद्योग वाणिज्य संघ गलकोट ईकाईले बुधबारदेखि आयोजना गरेको दशै उत्सव कार्यक्रमको उद्घाटनपछि बोल्दै मन्त्री केसीले संविधान कार्यान्वयनको लागि सबै दलहरु एकजुट हुनुको विकल्प नरहेको धारणा व्यक्त गरे ।
राज्यको पुर्नसंरचना, स्थानिय निकायको निर्वाचन लगायत मधेसका मुद्धाको निकासको लागि सबै राजनीतिक दलबीच राष्ट्रिय सहमति र सहकार्य आवश्यक रहेको मन्त्री केसीले बताए । फरक प्रसंगमा मन्त्री केसीले राज्य पुर्नसंरचना गर्दा ईलाका आधारमा गरिने भएपनि जस्ताको त्यस्तै ईलाकालाई गाउँपालिका नबनाईने प्रस्ट पारे । ईलाकालाई आधार मानी भौगोलिक बनावटलाई ध्यान दिदै जनतालाई सहज हुने गरि पुर्नसंरचना गरिने उनको भनाई थियो ।
गलकोट क्षेत्रको विकास निर्माणमा सक्दो सहयोग गर्ने समेत उनले प्रतिबद्धता जनाएका छन् । साना सहरी विकास कार्यक्रममार्फत हटियालाई नमुना र ब्यबस्थित सहर बनाउनको लागि सहयोग गर्ने उनले बताए ।
कार्यक्रममा उद्योग बाणिज्य संघ बागलुङको बरिष्ठ उपाध्यक्ष युबराज राजभन्डारी, नेपाली कांग्रेस बागलुङका सचिब नबराज पौडेल, नेकपा एमाले प्रदेश नं ४ का सदस्य जनक पौडेल, नेकपा माओवादी केन्द्र महाधिवेशन आयोजक समिती सदस्य तिलक उप्रेती, राष्ट्रिय जनमोर्चा बागलुङका उपाध्यक्ष बेदिलाल सापकोटा, नयाँ शक्ति नेपालका केन्द्रिय परिषद सदस्य बमबहादुर गुरुङ लगायतले बोलेका थिए ।
कार्यक्रम ईकाइ अध्यक्ष बिरेन्द्र श्रेष्ठको अध्यक्षता, उपाध्यक्ष ढालिन्द्र गौतमको स्वागत र सचिव हेमन्त भण्डारीको संचालनमा सम्पन्न भएको थियो । बुधबारदेखि सुरु भएको मेला २२ गतेसम्म चल्ने आयोजकले जनाएका छन् । मेलामा १ लाख बढी धन राशीको भलिबल प्रतियोगितासहित अन्य खेलकुद र मनोरञ्जनात्मक कार्यक्रम सन्चालन हुने जनाइएको छ ।