बागलुङ, २० असोज – नवदुर्गा सुरुवात भएलगत्तै बागलुङका वित्तिय संस्थामा सेवाग्राहीको चाप बढेको छ । नयाँ नोट सटही सुरु तथा शिक्षकको चौमासिक तलब र सामाजिक सुरक्षा भत्ता निकासाका कारण सेवाग्राहीको चाप बढेको नेपाल बैक बागलुङका शाखा प्रबन्धक दुर्गाप्रसाद अर्यालले जानकारी दिए ।
विशेषगरी बैंकमा दशैको लागि नयाँ नोट साट्न आउने सेवाग्राहीको संख्या बढी रहेको छ । नेपाल बैंक लिमिटेडले सर्वसाधारणको लागि साढे दुई करोड नयाँ नोट वितरण गर्ने जानकारी दिएको छ ।
प्रतिव्यक्ति पाँच हजार रुपैयाँ बराबरको नयाँ नोट सटही गरिएको छ । बैकले सर्वसाधारणको लागि मंगलबार र बुधबार नोट साट्ने सेवा प्रदान गरेपनि उपभोक्ताले भने आवश्यक मात्रामा नयाँ नोट पाउन नसकेको गुनासो गरेका छन् ।
बैंकले यसवर्ष एक सय रुपैयाँको मात्र नयाँ नोट सटही गर्दा पाँच, दश, पचास, पाँच सय र हजारको खुद्रा नयाँ नोट सर्वसाधारणले पाउन सकेका छैनन् । राष्ट्र बैंकले सयको बाहेक अन्य कुनैपनि नोट नपठाएको कारण सेवाग्राहीको माग अनुसार सेवा प्रदन गर्न नसकेको शाखा प्रबन्धक आर्यालको भनाई छ ।
नेपाल बैंकबाट मात्रै अहिले दैनिक १० देखि ११ करोड रुपैयाँ बहिरिने गरेको छ । सेवाग्राहीलाई तत्काल सेवा दिने र कसैलाई पनि रित्तो हात नफर्काउने उद्देश्यले आफूहरुले काम गरिरहेको प्रबन्धक आर्यालले बताए ।
