बागलुङ, १९ असोज – बुर्तिबाङ बजार र आसपासका क्षेत्रमा अवैध ढंगले सञ्चालनमा आएका व्यवसायलाई पूर्णरुपमा निषेध गरिने भएको छ । एकीकृत सेवा केन्द्र बुर्तिवाङको मंगलबार बसेको बैठकले उद्योग वाणिज्य संघ इकाईका पदाधिकारीमार्फत बुर्तिवाङमा संचालित व्यवसायलाई वैधानिक रुपमा संचालन गर्न भनेको छ ।
सेवा केन्द्र प्रमुख जनक थापाको अध्यक्षतामा बसेको बैठकले दशै तिहार जस्तो महान पर्व आइरहेको बेला बजारमा अनाधिकृत रुपमा हुने अवैध व्यापार र म्याद नाघेका अखाद्य बस्तु बेचविखन लगायत नेपाल सरकारको नियमअनुसार दर्ता प्रक्रियामा नगई सञ्चालनमा आएका व्यवसायलाई रोक्ने निर्णय गरेको छ ।
कतिपय व्यवसायीले सडक नै अवरुद्ध गर्ने गरि सञ्चालनमा ल्याएका पसललाई हटाउन उद्योग वाणिज्य संघलाई आग्रह गरेको छ । यदि अनुगमनका क्रममा त्यस्तो अवस्था देखिएमा नेपाल सरकारको कानुनबमोजिम कार्वाही प्रक्रियाका लागि सम्बन्धित निकायमा मुद्धा समेत चलाउन सकिने सेवा केन्द्र प्रमुख थापाले बताए ।
सेवा केन्द्रलाई अवैध रुपमा सञ्चालनमा आएका पसल तथा व्यवसायलाई रोक्न सरकारी निर्देशन समेत आएको र बिना दर्ताका व्यवसाय वा व्यवसायीले उपभोक्ता माथि कालोबजारी सिर्जना गर्ने, मनपरी मुल्य निर्धारण गर्ने गरि उपभोक्ता अधिकारलाई हनन गर्न सक्ने भएकाले केन्द्रको बैठकले त्यस्तो कार्य नगर्न अनुरोध गरेको छ । यसैसँगै मदिराको कारोवार गर्न सरकारबाट अनुमति लिन समते बैठकले आग्रह गरेको छ ।
