बागलुङ, १९ असोज – जिल्लाको राजकुत गाविसस्थित नरसिंहकोट मन्दिर पुनःनिर्माणसँगै दशैका अवसरमा आयोजना गरिएको मेला मंगलबारदेखि शुरु भएको छ । स्थानीय परिवर्तनशील युवा क्लवले आयोजना गरेको दशैं मेलासँगै पुननिर्माण गरिएको नरसिंहकोट मन्दिरको बागलुङ क्षेत्र नं. ३ का सांसद ज्ञानकुमारी छन्त्यालले उद्घाटन गरिन् । कार्यक्रममा बोल्दै साँसद छन्त्यालले परम्परागत रुपमै महत्व राख्ने नरसिंहकोट मन्दर यस क्षेत्रको एक धार्मिक पहिचान रहेको भन्दै यस्तो धार्मिक धरोहरको सबैले संरक्षण गर्नुपर्ने बताएकी थिइन् । कार्यक्रममा राजकुत गाविसका सचिव नारायणप्रसाद पौडेल, सांसदका स्वकिय सचिव सागर छन्त्याल, क्लवका पूर्वअध्यक्ष प्रकाश कुँवँर, पुजारी तारानाथ पौडेल लगायतले मन्तव्य व्यक्त गरेका थिए । क्लबका अध्यक्ष राजु परियारको अध्यक्षतामा सम्पन्न भएको कार्यक्रममा समाजसेवी प्रताप कुवँरको स्वागत तथा शिक्षक रामजी कुवँरको सञ्चालनमा सम्पन्न भएको थियो । मेलामा आयोजना गरिएको खेलकुद तथा साँस्कृतिक कार्यक्रमहरु आजदेखि शुरु हुदैछन् ।
