सदीक्षा बनिन ‘मिस पोखरा’

पोखरा, १९ असोज-दस प्रतियोगीलाई पछि पार्दै २१ वर्षीया सदीक्षा पाण्डे मिस पोखरा बनेकी छन् । पोखरा सभागृहमा सम्पन्न आठौं संस्करणको मिस पोखराको उपाधि उनले चुमेकी हुन् । उनी मिस भ्युअर च्वाइस र मिस पपुलारिटी सबटाइटल समेत जित्न सफल भइन् ।
प्रतियोगितामा प्रश्मि थापा फस्र्ट रनरअप र उन्नति गुरुङले सेकेन्ड रनरअपको उपाधि चुमे । पोखरा जेसिजको आयोजना तथा इभेन्ट्स फर यु प्रालिको व्यवस्थापनमा भएको प्रतियोगिताकी उपाधि विजेता पाण्डेले ५० हजार रुपैयाँसहित स्कुटर पाइन् ।
उनी मिस नेपालको प्रतिस्पर्धामा सिधै जान पाउनेछिन् । फस्र्ट रनरअपले ३० हजार र सेकेन्ड रनरअपले २० हजार रुपैयाँसहित एक/एक जियोनी मोबाइल पाए ।
प्रतियोगितामा मनिला हिराचनले मिस पर्सनालिटी, बेस्ट ड्रेस, मिस जक्सन पपुलारिटी जितिन् । शृतिका गुरुङ मिस क्याटवाक र मिस फोटोजेनिक भइन् भने विमला गुरुङले मिस ट्यालेन्ट र अञ्जना रामदामले मिस बेस्ट स्माइलको टाइटल जिते ।
पोखरा जेसिजले सन् १९९५ बाट मिस पोखरा सुरु गरेको थियो । सन् १९९९ पछि हुन नसकेको प्रतियोगिता २०१३ देखि फेरि थालिएको हो ।