बागलुङ पश्चिमकै सर्वाधिक पुरस्कार राशीको  फुलबलको उपाधि बुटवलले जित्यो

बागलुङ, २७ फागुन– गल्कोट नगरपालिका–११ रिघाको खेल मैदानमा गत फागुन १९ गते सुरु भएको बागलुङ पश्चिमकै सर्वाधिक पुरस्कार राशीको फुटबल प्रतियोगिताको उपाधि रानीबगिया युवा क्लब बुटवलले जितेको छ । आयोजक रिघा खेलकुद विकास समितिलाई ०–२ गोलले पराजित गर्दै उपाधि हात पारेको हो । बिजयी टिमले १ लाख १ हजार १ सय ११ नगदसहित मेडल र ट्रफी हात पार्न सफल भएको छ । त्यस्तै, रिघा खेलकुद विकास समिति रिघा उपविजेता बन्दै ५५ हजार ५ सय ५५ रुपैयाँ पुरस्कार प्राप्त गरेको छ । त्यस्तै, खुल्ला सामूहिक लोकनृत्य प्रतियोगीतामा ग्वालीचौर प्रथम, पाण्डवखानी द्धितिय र आयोजक तृतिय भएका छन् ।
प्रथम, द्धितिय र तृतिय हुने समुहले क्रमशः २० हजार २ सय २२, १० हजार १ सय ११ र ५ हजार नगदसहित मेडल र प्रमाण पत्र प्राप्त गरेका छन् । त्यस्तै, ऐतिहासिक धनुषवाण प्रतियोगितामा शिव मिलन युवा क्लब रिघा लाम्चे प्रथमहुँदै १० हजार हात पारेको छभने आयोजक द्वितिय भई ५ हजार प्राप्त गरेको छ । कार्यक्रममा स्थानिय सोरठी, घाटु लगाएतका साँस्कृतिक झलक र झाँकीहरुको प्रदर्शन गरिएको थियोभने कार्यक्रमको लागि सहयोग गर्ने सहयोगदाताहरुलाई सम्मान गरिएको थियो ।
कार्यक्रमको लागि झण्डै ११ लाख बढी खर्च भएको र २५ लाखभन्दा बढीको कारोवार भएको वडा नं. ११ का वडा अध्यक्ष डम्वर श्रीसले बताए । कार्यक्रमको अन्तिम दिन पश्चिमाञ्चल खेलकुद विकास समितिका अध्यक्ष खगराज पौडेलले प्रतियोगितको समापन समारोहलाई सम्बोधन गर्दै खेलमा अनुशासन महत्वपूर्ण हुने हुनाले खेलाडीलाई सचेत हुन आग्रह गरे । उनले फुटबल खेलमा रिघा अघि बढिसकेको चर्चा गर्दै थप पूर्वाधार विकासका लागि राज्यले लगानी गर्नु पर्ने बताएका थिए । समापन समारोहमा पश्चिमाञ्चल सदस्य एवं धौलागिरि इन्चार्ज सम्पन्न श्रेष्ठ, खेलाडी थम प्रकाश पुन लगाएतले मन्तव्य व्यक्त गरेका थिए । कार्यक्रम खेलकुद विकास समिति रिघाका अध्यक्ष दानबहादुर श्रीसको अध्यक्षता, सचिव इन्द्रा काउचाको स्वागत तथा सल्लाहकार देव विश्वकर्माको सञ्चालनमा सम्पन्न भएको थियो ।