ओली सरकारकै ‘बजेट’लाई प्रचण्ड सरकारले दियो निरन्तरता

संसदलाई बच्चाबच्ची खेल्ने थलो बनाइयो – रवीन्द्र अधिकारी 
काठमाडौँ, १३ असोज – सरकारले पूर्ववर्ती केपी ओली नेतृत्वको सरकारले ल्याएका बजेट आश्रित आर्थिक विधेयकलाई सरकारले निरन्तरता दिने भएको छ । व्यवस्थापिका संसदको बिहिवार बसेको बैठकमा उपप्रधान एवं अर्थमन्त्री कृष्णबहादुर महराले बजेट आश्रित विधेयकहरू संसदमा ‘टेबल’ गरेका छन् । संसदको नियमावलीको धारा निलम्बन गरी पुराना विधेयकहरु संसदमा पेश गरिएको हो ।
नियमावलीको व्यवस्था बहुमतबाट संशोधन गर्ने सत्तारुढ दलको निर्णय प्रति एमालेले विरोध जनाएको छ । संसदमा आर्थिक विधेयक पेश गरियोस् भन्ने प्रस्तावमाथिको छलफलका क्रममा पूर्वअर्थमन्त्री विष्णु पौडेलले विगतमा बजेट आश्रित विधेयक अस्वीकृत गर्ने दलहरू सोही विधेयक जस्ताको तस्तै पारित गर्न राजी हुन तयार भएकोमा सरकारलाई धन्यवाद दिए ।
‘हिजो अस्वीकृत गर्ने सन्दर्भमा जे–जस्तो तर्क प्रस्तुत गरिएको थियो, तर जस्ताको तस्तै पेश गरिएको छ’ पौडेलले भने ‘ आफैँले अस्वीकृत गरेको विधेयक ल्याउने अवस्था आउनु सच्चाइलाई स्वीकार गरेर हिजो अस्वीकृत विधेयकलाई स्वीकार गरेकोमा धन्यवाद ।’
पौडेलले नियम निलम्बन गर्दापनि बहुमत र अल्पमतको आधारमा गलत संसदीय अभ्यास गरिएको बताए ।
एमालेकै रवीन्द्र अधिकारी सरकारले पुरानै विधेयक ब्यँुताएर विश्वमा नभएको नयाँ प्रचलन स्थापित गरेको टिप्पणी गरे । ‘बजेट र बजेट कार्यान्वयन सम्बन्धी विधेयक सँगै पारित गर्नु पर्नेमा किन असफल गरियो ? आज नियम निलम्बन गरी सोही विधेयक ल्याउनु पर्ने अवस्था किन आयो ?,’ अधिकारीले प्रश्न गरे ।
सांसद अधिकारीले समाान्य परिस्थितिलाई असामान्य बनाएर विधेयक फेल गर्ने कुरा कलंकित भएको टिप्पणी गरे । ‘संसदमा जुन नौटकी र नाटक देखाइएको छ, त्यो भारी हुनेछ’ उनले भने, ‘संसदलाई बच्चाबच्ची खेल्ने थलो बनाइयो ।’
राप्रपा नेपालका विक्रमबहादुर थापाले आफैँले असफल बनाएको पुरानै विधेयक पारित गर्नुपर्ने अवस्था आउनु विडम्बनाको विषय भएको बताए । नेमकिपाका प्रेम सुवालले संसद नियमावली निलम्बन गर्नु लोकतन्त्रलाई कमजोर बनाउने षड्यन्त्र भएको बताए ।