५ वर्षअघि फरार अभियुक्त पक्राउ

पर्वत, ११ असोज – जिल्ला प्रहरी कार्यालय पर्वतले जिल्ला अदालत पर्वतबाट सजाय सुनाएर फरार रहेका अभियुक्तलाई नियन्त्रणमा लिएको छ । जिल्ला प्रहरी कार्यालय पर्वतबाट खटिएको विशेष टोलीले विभिन्न मितिमा सजाय सुनाइएका ५ जना व्यक्तिलाई सोमबार नियन्त्रणमा लिएको हो ।
नियन्त्रणमा लिएका व्यक्तिमध्ये चोरी मुद्धामा २०६९ मा ३ बर्ष १० दिन कैद सजाय सुनाईएका तिलाहार–७ का सन्तोष लामिछाने, चोरी मुद्धामा नै २०७१ सालमा १ महिना १५ दिन कैद सजायसहित ५५ हजार ६ सय जरिवाना सुनाइएका तिलाहार–६ का अनिल किसान रहेका छन् । त्यस्तै सार्वजनिक अपराधमा संलग्न क्याङ गाविस–९ का मिलन पुन, तिलाहार– ९ का राजेन्द्र हमाल र बाजुङ–१ का भरतबहादुर पौडेललाई समेत प्रहरीले नियन्त्रणमा लिएको छ ।
पर्वत जिल्ला अदालतको फैसलाले पौडेल र हमाललाई जनही ५ हजार जरिवानाको फैसला गरेको थियो भने पुनलाई १ हजार जरिवाना तोकेको थियो । पर्वतमा करिव १ महिना अघि आएका प्रहरी नायव उपरिक्षक शेखर खनालले फरार अभियुक्त नियन्त्रण कार्यलाई तिब्रताका साथ अघि बढाउने बताए ।
अहिले पर्वत जिल्ला अदालतले विभिन्न मितिमा फैसला गरेर कार्बाही सुनाईएका तीन सय ३८ जना व्यक्तिहरु अझै पनि फरारको सूचीमा रहेका छन् । जसमध्ये १४ जना जन्मकैदको फैसला सुनाइएको अभियुक्तहरु छन् । फरार व्यक्तिहरुबाट सात सय आठ बर्ष दुई महिना १८ दिन कैद सजाय र छ करोड ५४ लाख ३४ हजार चारसय ८५ रुपैँया दण्ड जरिवाना असुल उपर हुन बाँकी रहेको अदालतको तथ्याङ्क छ । यो तथ्याङ्क सार्वजनिक भएपछि पहिलोपटक प्रहरीले सोमबार ५ जना व्यक्तिबाट फैसला असुल उपर गर्न सफल भएको हो ।