पोखरा,११ असोज-‘मिस तमुस्यो’ को पाँचौं संस्करणको टाइटल स्याङ्जाकी निशाले जितेकी छन् । पोखरा सभागृहमा शनिबार भएको फाइनलमा १८ प्रतिस्पर्धीलाई उछिन्दै उनले ताजसँगै ५० हजार रुपैयाँ पुरस्कार र एक साताको हङकङ भ्रमण प्याकेज प्राप्त गरेकी छन् । फस्र्ट रनरअप भएकी कास्कीकी स्यारोनले ३० हजार र सेकेन्ड रनरअप सुयशाले २० हजार रुपैयाँ पाए ।
प्रतियोगितामा पूर्व मिस नेपाल नीलिमा गुरुङ, फिल्म निर्देशक रामबाबु गुरुङ, पूर्वमिस तमुस्यो बुद्धिलक्ष्मी गुरुङ तथा ट्रेनर नेपालका अध्यक्ष रविन गुरुङ निर्णायक थिए । प्रतियोगिताको आयोजना बर्सेनि तमु विद्यार्थी छोंज धिं कास्कीले गर्दै आएको छ ।
प्रीति ‘मिस मंगोल’
मिस मंगोल नेपाल २०१६ को ताज काठमाडौं निवासी प्रीति गुरुङले जितेकी छन् । २५ प्रतिस्पर्धी उछिन्दै उनले मिस पब्लिक च्वाइस अवार्ड पनि आफ्नो पोल्टामा पारिन् । स्नातक अध्ययनरत प्रीतिले उपाधिसँगै एक लाख रुपैयाँ पाइन् । उनलाई पछ्याउँदै धनकुटाकी बरुना राई र दैलेखकी योजना थापामगर क्रमश: फस्ट रनरअप र सेकेन्ड रनरअप भइन् ।
योजनाले मिस ट्यालेन्टको उपाधि पनि हात पारिन् । प्रतियोगितामा ताप्लेजुङकी रूपा आङबुहाङले मिस फ्रेन्डसिप र मिस फोटोजेनिक, झापाकी नवीना कुलुङले मिस पङ्चुअल, ताप्लेजुङकी मञ्जु लिम्बूले मिस बेस्ट हेयर, बागलुङकी खुसी मगरले मिस लिडरसिप, काठमाडौंकी डायना बान्तवा राईले मिस बेस्ट स्किन र स्याङ्जाकी कोपिला गाहाले मिस डिस्सिप्लिनको अवार्ड उचाले ।
मंगोल समुदायका युवतीहरूको सशक्तीकरण उद्देश्यसहित एक्सन इन्टरटेनमेन्टले हरेक वर्ष मिस मंगोल गर्दै आएको छ । यस पटक सिंगापुर इन्टरप्राइजेजले शीर्ष प्रायोजन गरेको थियो भने प्रतियोगितामा द हाइलेन्ड आर्टको तर्फबाट फेसन डिजाइनर कल्पना योङहाङले तयार गरेको ढाकाको साडी, सिंगापुर एयरलाइन्सको पोसाक प्रस्तुति निकै आकर्षक बनेको थियो ।
पूर्वमिस नेपाल सुविन लिम्बू, अभिनेता कृष्ण मल्ल, हेयर स्टाइलिस्ट निलडेभिड कटवाल, शिक्षासेवी यम पुन, संगीतकार शान्तिराम राई, पूर्वमिस मंगोल वर्षारानी गुरुङ, मनिका राई र वासुदेव दाहाल निर्णायक मण्डलमा थिए ।
निशा ‘मिस तमुस्यो’ र प्रीति ‘मिस मंगोल’
