टंक पन्थ
प्राणीका जगमा छ प्रेम गहिरो संसार नै डुब्दछ
सारा श्रृष्टि रमेर बाँच्छ सुखमा प्रेमै छ यो खुल्दछ।
आमा प्रेम बगाउँछिन् रगतमा सन्तानका खातिर
स्रष्टाका अनुरागका पलहरु हुन् प्रेमकै तस्बिर।।
आस्थाका नमुना मुना प्रणय संसारमा व्याप्त छन्
गाढा प्रेम सजाउने अमर ती लैला–मजनुँ साथ छन्।
निष्ठा यो गहिरो भए सकलले पुज्छन् महल ताजको
रानीघाट सदैव खुल्छ उपमा नेपालको ताज यो।।
यो एकान्त घना छ सुन्दर कला आलोक हो यारको
रानी तेज उदाउँछिन ह्रदयमा सम्मान हो प्यारको।
रानीघाट अपूर्व सुन्दर छटा उद्यान हो प्रेमको
सांचो प्रेम सदैव बाँच्छ युगमा मुस्कान हो प्रेमको।।
श्रद्धा जाग्दछ भित्र–भित्र मनमा स्वर्गीय उत्सर्ग त्यो
चोखो प्रेम अनन्त हुन्छ विजयी उल्टाउनै सक्छ को?
रानीका पद चिन्ह छन् महलमा खुल्छन कला गौरव
स्रष्टाका सब सिर्जना जगतका हुन् प्रेमका सौरव।।
ऐले प्रेम बजारमा डलरका पैसासँगै साट्दछन्
अन्धो भै मदले खुशी चमनको आत्मीयता त्याग्दछन्।
राम्रो चित्त लिएर अपर्ण गरे बन्छन् महल प्रेमका
भाकामा तबला जुराउन सके संगीत छन् प्रेमका।।
रानीघाट छ प्रेमको बगरमा काली सधैं गाउँछिन्
रानी तेज सदैव खड्गसँगको गाथा बनी आउँछिन्।
कृष्णाका जलमा छ शान्ति विनयी आनन्दको राग छ
आत्माभित्र चुलिन्छ प्रेम रस यो संसारकै सार छ।।
ताजा छन् सब विश्वका नजरमा आश्चर्य स्मारक
सारा युद्ध कथा व्यथा भुवनका हुन् प्रेमकै कारक।
यौटा फूल फुलेर प्रेम रसिलो बास्ना चलोस सुन्दर
रानीघाट खडा छ कानन सरी हो प्रेमको मन्दिर।।
माया खुल्छ सुगन्धमा ह्रदयको आनन्दमा झुम्दछन्
सारा प्रेम सुधा बनी अमृतका प्यालाहरु चुम्दछन्।
सांचो प्रेम सजाउने अटल यो विश्वासमा झल्कियोस
रानीघाट सधै प्रेम रसको गाथा बनी चम्कियोस।।
रानी छन उपमा छ प्रेम गहिरो ज्ञाताहरु पढ्दछन्
साँच्चै स्वच्छ पवित्र प्रेम रसमा सञ्जीवनी भर्दछन्।
हाम्रो मर्म छुने गरी ह्रदयमा लेखिन्छ यो सर्वदा
चट्टानी तट यो कुँदेर यसरी दर्बार हुन्छन खडा।।
