पहिरोले विस्थापित

बागलुङ, ७ असोज – जिल्लाको राङ्खानीमा पहिरोका कारण एक परिवार बिस्थापित भएका छन्भने चार घर जोखिममा परेका छन् । लगातारको बर्षाका कारण घर तलबाट पहिरो गएपछि राङ्खानी गाविसको वडा नम्वर १ दोवानाका कृष्ण आचार्यको परिवार बिस्थापित भएको स्थानीयले बताएका छन् ।
पहिरोले डिलबहादुर क्षत्री, प्रतिभा शर्मा, उमादेवि पाध्या र मनिकर्ना खत्रीको घर जोखिममा परेको स्थानिय जयराम आचार्यले जानकारी दिए । अहिलेसम्म नफुटेको मुल बर्षाका कारण खेतमा फुट्न थालेपछि कृष्ण आचार्यको एक हल, कुमार श्रीसको ३ हल, उमादेवि शर्माको १ हल, हरिकला पाध्याको १ हल र भागिरथी खत्रीको २ हल बरावरको खेत बगाएको छ ।
पहिरोले चौतारो, गोरेटो वाटो, मोटरवाटो समेत बगाएको आचार्यले बताए ।
विद्यालयमा क्षति
अबिरल बर्षासंगै गएको पहिरोले बागलुङको एक विद्यालयमा क्षति पुगेको छ । पहिरोले बागलुङको पालाकोट ६ बाटुलेमा अवस्थित जनचेतना प्राविमा क्षती पुगेको हो ।
विद्यालय परिसर अगाडी रहेको खेलकुद मैदान भत्किए पछि अध्ययनरत बालबालिकाको संरक्षणमा समस्या भएको प्रधानाध्यापक गोविन्दप्रसाद उपाध्यायले बताए । तत्काल पुननिर्माण नगरे विद्यालय संगै विद्यालय नजिक रहेका चक्रपाणी आचार्य र शिव गौतमको घरमा समेत क्षति पुग्न सक्ने उनले जानकारी दिए ।
जिल्ला शिक्षा कार्यालय बागलुङको एक लाख रुपैयाँको लागतमा गत जेठमा निर्माण गरिएको तारबाँध करिब ७ मिटर भत्किएको र ५ मिटर चकेपछि बालबालिकाको सुरक्षामा कठिनाई भएको छ ।
बेगखोलामा वारपार गराउन स्वंयम्सेवक
बेनी–जोमसोम सडक खण्ड अन्तर्गत म्याग्दीको बेगखोलामा बाढीको कारण वारपारमा समस्यामा परेका यात्रुलाई सहयोग गर्न अनेरास्ववियुको स्वयम्सेवक टोली खटिएको छ ।
बाढीले सडक, पुल र बेलिब्रिज बगाएपछि वारपारका लागि समस्यामा परेका सर्वसाधारण र यात्रुको सहयोगका लागि बुधबारदेखि अनेरास्ववियु, म्याग्दीले १० जनाको स्वयम्सेवक टोली खटाएको हो ।
घटनास्थलमा प्रहरीको उपस्थिति रहेपनि त्यहाँ यात्रुलाई वारपार गराउनेले महँगो शुल्क लिएको थाहा पाएपछि त्यस्तो कार्यलाई निरुत्साहित गर्दै यात्रुलाई निःशुल्क वारपारमा सहयोग गर्न स्वयम्सेवकका रुपमा खटिएको अनेरास्ववियु म्याग्दीका जिल्ला अध्यक्ष एवम् केन्द्रीय सदस्य प्रकाश पौडेलले बताए । ‘यहाँ बिचौलियाले एक जनालाई वारपार गराएबापत महँगो शुल्क लिएको पाइयो, यसले यात्रु मर्कामा परेपछि हामी निःशुल्क वारपारमा सहयोग गर्न स्वयम्सेवकका रुपमा खटिएका हौँ’, अध्यक्ष पौडेलले भने ।
उनले यात्रुको सहजताका लागि स्वयम्सेवक खटिएपछि त्यहाँ महँगो शुल्क लिएर यात्रु वारपार गराउँदै आएका विचौलिया विस्थापित बनेको समेत बताए । अध्यक्ष पौडेलको नेतृत्वमा खटिएको १० जनाको स्वयम्सेवक टोलीले पहिलो दिन सय वटा मोटरसाइकल र सयौँ सर्वसाधारण यात्रुलाई निःशुल्करुपमा वारपारमा सहयोग गरेका छन् ।
अनेरास्ववियुले बेगखोलामा यात्रुको सहज वारपारका लागि एक साता सम्म दैनिक १० जना स्वयमसेवक खटाउने निर्णय गरेको छ ।