लिबाङ (रोल्पा), ५ मंसिर – रोल्पाका निर्वाचन कर्मचारी कडा सुरक्षा व्यवस्थासहित मंगलबार मतदानस्थलतर्पm हिँडेका छन् । निर्वाचनभन्दा तीन दिनअघि मतदानस्थल पुगिसक्नुपर्ने प्रावधान छ । सुरक्षा संवेदनशीलता, भौगोलिक विकटता र यातायातका साधनको कमीका कारण केही दिनअघि नै कर्मचारीलाई मतदानस्थलतर्पm पठाइएको निर्वाचन कार्यालयले जनाएको छ ।
१५ देखि १८ कोष टाढाका सबैजसो मतदानस्थलमा निर्वाचन कर्मचारी मंगलबार बिहान हिँडिसकेका छन् । निर्वाचन अधिकारी लिलु गिरीका अनुसार थबाङ गाउँपालिकाअन्तर्गत जनपक्षीय प्रावि, साविक गाविस भवन, हिमालय मावि टुटु, भानुभक्त मावि, तेलखोला उवाका लागि कर्मचारी र सुरक्षा टोली खटिएका हुन् ।
त्यस्तै, सुनछहरी गाउँपालिकाका जैमाकसला, गाडबाङ, सेरम घुसबाङ, कामीडेरा, बाहिरी र भित्री गाम, जेलबाङ, सिउरी मतदानस्थलका लागि पनि कर्मचारी हिँडेका छन् । दुईखोली गाउँपालिकामा रहेका मतदानस्थल पाछाबाङ, मौलाबोट, थुनीबोट, खरीबोट कुरेली र सुकिदह गाउँपालिकाका मौलाबोट, लोटचौर, ओत, मेलडारी, जिनाबाङ, नाउली, सुखा ओढार, राँक जायचौर र देउलताकुरका लागि पनि कर्मचारी खटिएको निर्वाचन कार्यालयले जनाएको छ । त्रिवेणी गाउँपालिकाका लिङदुङ, सिमपानी, जुगार र माझबोटका लागि पनि निर्वाचन कर्मचारी मतपेटिकालगायत सामग्री बोकेर गाडीमा गएका छन् ।
भौगोलिक रूपमा टाढाका मतदानस्थलका लागि निर्वाचन कर्मचारी पहिलो चरणमा पठाएको प्रमुख जिल्ला अधिकारी डा. डिजन भट्टराईले बताए । दुई चरणमा सबैजसो मतदानस्थलका कर्मचारी पठाउने तयारी छ । बुधबार नगरपालिकाबाहेकका मतदानस्थलमा कर्मचारी पठाउँदै छ ।
नेपाली सेना, सशस्त्र र जनपद प्रहरीको विशेष सुरक्षा प्रबन्धमा मतदान सामग्रीसहित कर्मचारीलाई मतदानस्थलसम्म पु¥याउन थालेको प्रहरी नायब उपरीक्षक ज्ञानेन्द्रप्रसाद फुयाँलले जानकारी दिए । म्यादी प्रहरी भने सार्वजनिक यातायातका साधनबाट मतदानस्थल पुग्दै छन् । भाडामा यातायातका साधन नपाएपछि बुटवलबाट दुई दर्जन गाडी झिकाएको प्रहरी निरीक्षक सुदर्शन पन्थीले बताए ।
जाजरकोट संवाददाताका अनुसार मंसिर १० गते हुने निर्वाचनका लागि कर्मचारी सम्बन्धित मतदानस्थलतर्फ प्रस्थान गरेका छन् । केही मतदानस्थल टाढा रहेकाले मंगलबार नै कर्मचारी पठाइएको प्रमुख जिल्ला अधिकारी पुष्पराज शाहीले जानकारी दिए । बारेकोट गाउँपालिका र जुनिचाँदे गाउँपालिकाका लागि कर्मचारी र सुरक्षाकर्मी पठाइएको उनले बताए । कर्णालीका जुम्ला, मुगु र कालिकोटसँग सिमाना जोडिएका ती गाउँपालिका पुग्न तीन दिन लाग्ने गर्दछ ।
सदरमुकामबाट थोरै ठाउँमा मात्र गाडी चल्ने भएकाले निर्वाचनमा खटिने कर्मचारीले पैदलै हिँड्नुपर्ने बाध्यता छ । कर्मचारीलाई नेपाली सेनाले स्कर्टिङ गरेर लगेको छ । सात तह रहेको जाजरकोटमा नलगाड, छेडागाड, शिवालय र भेरीमा बुधबार कर्मचारी खटाउने तयारी रहेको प्रजिअ शाहीले बताए । जाजरकोटमा ८५ मतदानस्थलमध्ये ७२ वटालाई अति संवेदनशील सूचीमा राखिएको छ ।
