काठमाडौं, २९ कात्तिक – अख्तियार दुरुपयोग अनुसन्धान आयोगले वैदेशिक रोजगार विभागका महानिर्देशक विश्वराज पाण्डेलाई पक्राउ गरेको छ ।वैदेशिक रोजगार विभागमा कार्यरत शाखा अधिकृत कृतिबल्लभ पौडेल र नायव सुब्बा खड्ग केसीलाई मंगलबार बेलुका पक्राउ गरिएको थियो । अदालतमा चलिरहेको मुद्दा मिलाइदिने भन्दै सेवाग्राहीसँग १० लाख रुपैयाँ घुस लिँदै गर्दा बानेश्वरको एक रेष्टुरेन्टबाट उनीहरुलाई पक्राउ गरिएको थियो ।
रेष्टुरेन्टमा रकम बुझेर खाजा खाँदै गर्दा उनीहरुलाई पक्राउ गरिएको थियो । उनीहरुको बयानका आधारमा र विभागका महानिर्देशक पाण्डेको अडियो पनि फेला परेपछि पक्राउ गरिएको अख्तियार दुरुपयोग अनुसन्धान आयोगका सहप्रवक्ता खगेन्द्र रिजालले बताए । “हिजो पक्राउ परेका दुईजनाको बयानको आधारमा र उनले पैसा डिल गरेको अडियो पनि फेला पारेपछि हामीले पक्राउ गरेका हौं,” रिजालले कुराकानीका क्रममा भने । म्यानपावर ठगीको मुद्दा मिलाइदिने नाममा उनीहरुले घुस मागेका थिए । पीडित पक्षले घुसदिनुभन्दा अघि नै अख्तियारमा जानकारी गराएको बताइएको छ ।
सुभद्राको योजनामा महानिर्देशक पक्राउ
वैदेशिक रोजगार विभागका बरिष्ठ अधिकारी पक्राउको कथा महाराजगञ्ज कार्यालय रहेको एसआरएस ओभरसिजसँग गएर जोडिएको छ। मानव तस्करीका लागि बद्नाम सो मेनपावरबाट गत वर्ष सेक्युरिटी गार्डका लागि ५२ व्यक्ति युएई गएका थिए। प्रतिव्यक्ति ८ लाख रुपैयाँ बुझाएर गएका उनीहरुले अलपत्र परेपछि नेपाल फर्किएर एसआरएसविरुद्ध वैदेशिक रोजगार विभागमा उजुरी दिएका थिए। पीडितको उजुरीका आधारमा विभागले एसआरएसको कारोबार रोक्का गरेको थियो। ५२ जना पीडितको दवाब थेग्न नसकेपछि विभागले मेनपावरको कारोबार रोकेको थियो।
कारोबार रोक्का भएपछि मेनपावर सञ्चालक सुभद्रा बराल भागेर आबुधावी पुगेकी थिइन्। लामो समयसम्म त्यहाँ बसेकी उनले उतैबाट रोक्का फुकुवाका लागि कानुनी प्रक्रिया सुरु गर्दै सर्वोच्चमा रिट दायर गरेकी थिइन्। सर्वोच्च अदालतले उनको पक्षमा फैसला सुनाउँदै एसआरएस ओभरसिजलाई सफाइको आदेश दिएको थियो।
सर्वोच्चको आदेशपछि राहत अनुभव गरेकी उनले रोक्का फुकुवाका लागि वैदेशिक रोजगार विभागमा प्रक्रिया सुरु गरेकी थिइन्। वैदेशिक रोजगार विभागका कर्मचारीले त्यसमा आनाकानी गर्दै घुस मागेका थिए। त्यतिबेला पैसा माग्ने विभागका कर्मचारीसँगको फोनटेप गरी सुभद्राले अख्तियारलाई बुझाएकी छिन्।
उनकै योजनाअनुसार मंगलबार साँझ ६ बजे १० लाख रुपैयाँ लिन विभागका दुई कर्मचारीलाई नयाँ वानेश्वरको इन्द्रेणी फुडल्यान्ड पुगे। त्यहाँ उनले पूर्व कुराकानीअनुसार वैदेशिक रोजगार विभागका अधिकृत पाैडेल र नासु केसीलाई १० लाख रुपैयाँ थमाइन्। तर उनले यो जानकारी पहिलै अख्तियारलाई दिइसकेकी थिइन्। अख्तियारको टोलीले घुस लिँदालिँदै पाैडेल र केसीलाई रंगेहात पक्राउ गर्यो।
‘मेनपावर सञ्चालकसँग विभागका कर्मचारीले पैसा बार्गेनिङ गरेको टेप हामीले पाएका छौं’, अख्तियार स्रोतले भन्यो, ‘महानिर्देशक पाण्डेले मेनपावर सञ्चालकसँगको बार्गेनिङ गरेको त्यो टेपसिहतका प्रमाणमा अनुसन्धान भइरहेको छ।’ वैदेशिक रोजगार विभागमा भ्रष्टाचार खुलेअाम हुने गरे पनि सो कार्यलयबाट सहसचिव तहको कर्मचारी घुस प्रकरणमा पक्रउ परेको यो पहिलो घटना हो।
पैसा ‘डिल’ गरेको अडियो भेटिएपछि महानिर्देशक पाण्डे पक्राउ
