कांग्रेसबाट देउवा नै अन्तिम प्रधानमन्त्री – ओली

प्रशन्न पोखरेल
पालुङटार, गोरखा, २९ कात्तिक – एमालेका अध्यक्ष केपी ओलीले नेपाली कांग्रेसबाट शेरबहादुर देउवा नै अन्तिम प्रधानमन्त्री हुन् भन्दै अब देश चलाउने जिम्मेवारी वामपन्थीको काँधमा आएको दावी गरेका छन्।
एमाले र माओवादी केन्द्रको संयुक्त चुनावी सभालाई सम्बोधन गर्न लमजुङ हुँदै गोरखा आइपुगेका ओलीले चुनावपछि वामगठबन्धनको सरकार बन्ने भन्दै कांग्रेस समर्थकलाई समवेदन दिन समेत भ्याए। ‘अब बुढो रुख ढल्यो, कांग्रेसका अन्तिम प्रधानमन्त्री नै शेरबहादुर देउवा हुन्’, गोरखाको पालुङटारमा बुधबार आयोजना गरिएको एमाले–माओवादी केन्द्रको संयुक्त चुनावी सभालाई सम्बोधन गर्दै अध्यक्ष ओलीले भने, ‘म कांग्रेस समर्थकलाई समवेदना दिन चाहन्छु, चुनावपछि वामगठबन्धनको सरकार बन्छ।’
पालुङटार कांग्रेसको समर्थनमा उम्मेदवार बनेका बाबुराम भट्टराईको गृहनगर हो, जहाँ ओलीले भट्टराईप्रति व्यंग्य गर्दै भने, ‘कर्कलोलाई बञ्चरो चलाउनु पर्दैन।’ ओलीले भट्टराईको नयाँ शक्ति पार्टीमाथि प्रहार गर्दै भने, ‘नयाँ शक्तिका अध्यक्ष (बाबुराम भट्टराई) बाहेक सबैलाई मैले एमालेमा समावेश गरिसकें, अब त्यो पार्टीमा अध्यक्ष मात्रै बाँकी छन्।’
ओलीले चुनावपछि बलियो वाम सरकार बनाएर पाँच वर्षमा गोरखा र देशभरी नै विकास र सम्वृद्धि ल्याउने दावी गरे। ‘चुनाव लगत्तै एमाले र माओवादी केन्द्रबीच पार्टी एकता पनि हुन्छ’, ओलीले थपे।
‘मतदातालाई कांग्रेसको बुढो रुख तथा भट्टराईको सिसा र प्लास्टिकको आँखा बोकेर नहिंड्न’ आग्रह गर्दै ओलीले गोरखा २ मा माओवादी केन्द्रका नारायणकाजी श्रेष्ठको जित सुनिश्चित रहेको दावी गरे।
पालुङटारको सभामा ओलीभन्दा अगाडि बोलेका माओवादी केन्द्रका अध्यक्ष पुष्पकमल दाहाल पनि बाबुराम भट्टराईमाथि उत्तिकै खनिए। ‘सिद्धान्त छोडेर पूँजीपतिको शरणमा पुगेकाले बाबुराम भट्टराईलाई गोरखाका मत माग्ने नैतिक अधिकार पनि छैन’, दाहालले भने, ‘यो गोरखाका शहिदको पनि अपमान हो।’
वामगठबन्धन बनेपछि दक्षिणपन्थीको निद हराम भएको भन्दै दाहालले कांग्रेसलाई आग्रह पनि गरे, ‘चितवन ३ मा हलो र गोरखा २ मा आँखालाई नबोक्नुस्।’ पालुङटारको सभामा गोरखा २ का वाम उम्मेदवार नारायणकाजी श्रेष्ठले निकै छोटो बोले। उनले चुनावपछि वामगठबन्धनको सरकार बनाएर पाँच वर्षमा आर्थिक सम्वृद्धि ल्याउने दावी गरे।
ओली र दाहालसँगै गृहजिल्ला गोरखा पुगेका बाबुराम भट्टराईका सहपाठी डा. उपेन्द्र देवकोटाले ‘वामगठबन्धनलाई सहयोग गर्नु आफ्नो धर्म सम्झेर गोरखा आएको’ बताए। देवकोटाले बाबुराम भट्टराईलाई ‘घसेटा र छेप्टा’ भन्दै कांग्रेस समर्थकलाई पनि हँसिया हथौडामा भोट हाल्न आग्रह गरे। भट्टराइमाथि प्रहार गर्दै देवकोटाले भने, ‘थारो भैंसीलाई कुँडो खुवाएर दुध दिँदैन, भट्टराईसँग कुनै मार्गचित्र छैन।’