म्याग्दी, २० कार्तिक-जिल्लाको सदरमुकाम बेनीमा सञ्चालित न्यू धौलागिरि बचत तथा ऋण सहकारी संस्थाले उत्पादनमुखी क्षेत्रमा लगानीलाई केन्द्रित गरेको जनाएको छ । संस्थाको १८ औं साधारणसभा तथा छैठौं अधिवेशनको अवसरमा आयोजित पत्रकार सम्मेलनमा जिल्लाभर सहकारीको सञ्जाल विस्तार प्राथमिकतामा रहेको अध्यक्ष लिलाबहादुर बानियाँले बताए । स्थानीय तहको निर्वाचन लगत्तै जिल्लाका ग्रामिण क्षेत्रमा सहकारी मार्फत कृषि, पर्यटन, पशुपालन, साना ब्यापार लगाएत विभिन्न क्षेत्रमा लगानी विस्तारका लागि सेयरसदस्य बृद्धि, सहकारी मर्ज गर्ने प्रस्ताव साधारणसभाबाट पारित गरेको अध्यक्ष बानियाँले जानकारी दिए । उनले जिल्लाको पाँचवटा गाउँपालिकाको केन्द्रमा सहकारी मार्फत कारोबार गर्ने गरी सहकारी मर्जको तयारी भइरहेको बताए । उनले सहकारीमार्फत सामाजिक उत्तरदाहित्व अन्र्तरगत हरेक बर्ष सहयोग गर्ने गरेको बताए । सहकारीको लगानीमा जेहेन्दार विद्यार्थीले मावि, स्नातक र ईन्जिनियरसम्म निशुल्क अध्ययन गरेको बताउँदै उनले मुनाफाको केही हिस्सा समाजमा आवश्यकता परेको क्षेत्रमा खर्च गर्ने बताए । उनले जिल्लामा सञ्चालित सहकारीको वित्तिय अवस्था, कर्जा प्रवाह, सेयर सदस्य संख्या र कार्यक्षेत्रको अध्ययन गरी मर्ज गरिने बताए । जिल्लाकै पुरानो सहकारी समेत रहेको धौलागिरिको शेयर पुँजी २ करोड ५५ लाख, कर्जा प्रवाह ३२ करोड, निक्षप सङ्कलन २९ करोड र जगेडा कोष ९० लाख रहेको सहकारीका सचिव रामजी प्रसाद सुबेदीले बताए । कर्जा प्रवाह संगै २८ लाख ३२ हजार खुद मुनाफा गरेको छ । सहकारीले ७ लाख २० हजार कर तिरेको छ । सहकारीमार्फत सञ्चालन गरिएको धौलागिरि ट्राभल्स एण्ड मनी ट्रान्सर्फरबाट ८८ करोड रेमिट्यान्स प्रवाह गरेको छ । वित्तिय कारोबार सँगै समाजिक क्षेत्रमा समेत सक्रिय रहेको सहकारीले उत्पादनमुखी क्षेत्रलाई समेत प्राथमिकतामा राखेर लगानी गर्ने गरेको छ । जिल्लामा सबैभन्दा बढि रेमिट्यान्स भुक्तानी गर्ने सहकारीले सामाजिक कार्यलाई थप प्रभावकारी बनाउने प्रतिबद्धता समेत जनाएको छ । यसैविच बार्षिक सामाजिक तथा शैक्षिक क्षेत्रमा करिव ३ लाख सहयोग गर्ने गरेको सहकारीले म्याग्दी बहुमुखी क्याम्पसमा अध्ययरत दृष्टिविहिन गोपाल खत्रीको स्नातक तहसम्मको शिक्षाका जिम्मा लिएको सहकारीले एकबर्षको शैक्षिक खर्च ३३ हजार सहयोग हस्तान्तरण गरेको छ । यसैविच अधिवेशनबाट बानियाँको अध्यक्षतामा पुरानै कार्यसमितिलाई सर्वसम्मति गरिएको छ ।
