कछुवा गतिमा साना दल, चुनावि रणनिति बनाएर मात्रै प्रचारमा लाग्ने

तारानाथ आचार्य/बागलुङ, १५ कात्तिक
आगामी मंसिर १० गते हुने संघ तथा प्रदेश सभाको निर्वाचनको लागि जिल्लाका साना दलले प्रचार अभियानको तयारी गर्दैछन् । ठुला दलले तामझामका साथ चुनावी प्रचारलाई तिब्रता दिइरहँदा साना दलले भने प्रचार–प्रसारको अन्तिम तयारीमा रहेको बताएका छन् । सामान्य तथा अनौपारिक भेटघाट र घरदैलोको कार्यक्रम जारी रहेको भएपनि औपाचारिक प्रचार अभियान भने थालीनसकेको साना दलले बताएका छन् । जिल्लाको ढोरपाटन नगरपालिकामा अनौपचारिक भेटघाट कार्यक्रम सञ्चालन गरिरहेको संघिय समाजवादी फोरम नेपालले बुधबारबाट औपचारिक प्रचार–प्रसारको अभियान थाल्ने प्रदेश सभा सदस्य निर्वाचन क्षेत्र नं २ को २ का उम्मेदवार यम कुमार पुनले जानकारी दिए । पार्टिले सबै तयारी गरेर जनताको घरदैलोमा औपचारिक रुपमा जान लागिएको उनको भनाई छ । पुन एक्लै घरदैलोमा पुगेर अनौपचारिक रुपमा जनताको भोट मागिरहेको बताए ।
पार्टि संगठनले तयारी गरिरहेकाले आफु एक्लै अनौपचारिक भेटघाटलाई अगाडि बढाएको पुनको भनाई छ । यस्तै संघीय समाजवादी फोरमकै प्रतिनिधि सभा सदस्य निर्वाचन क्षेत्र नं २ का उम्मेदवार यमबहादुर घर्ति मगर पनि अनौपचारिक भेटघाटमा ब्यस्त छन् । प्रचार अभियानको तालिका निर्माणको काम भैरहेको र बुधबारबाट औपचारिक रुपमा अभियान सुरु गरिने मगरले बताए । आमुल परिवर्तन मसिहा पार्टी नेपालले पनि औपचारिक प्रचार सुरु नगरेको जनाएको छ । नयाँ पार्टि भएकाले ग्रामिण तहमा संगठन नहुँदा प्रचारमा समस्या भएको प्रदेश सभा सदस्य निर्वाचन बागलुङ क्षेत्र नं २ को २ का उम्मेदवार दिलबहादुर बिकले बताए । तत्कालै संगठन निर्माण गर्दै शुभेक्षुकहरुको साथमा प्रचार अभियानमा लाग्ने उनको भनाई छ । अनौपचारिक घरदैलो गरिरहेको नयाँ शक्ति नेपालले पनि बुधबारदेखी आफ्नो औपचारिक प्रचार अभियान थाल्ने जनाएको छ ।
जिल्लाको नारायणस्थानमा अनौपचारिक भेटघाट गरेको नयाँ शक्तिले बुधबार बागलुङ नगरपालिकाबाट औपचारिक अभियान थाल्ने प्रतिनिधि सभा सदस्य निर्वाचन क्षेत्र नं १ का उम्मेदवार कृष्णप्रसाद शर्माले बताए । पार्टिले आफ्नो धारणासहित घरदैलोमा जाने निर्णय गरेकाले समय लागेको उनले बताए । नेकपा माले र समाजवादी पार्टि नेपालका प्रतिनिधि सभा सदस्य क्षेत्र नं १ बागलुङका साझा उम्मेदवार निरबहादुर क्षेत्रीले भने अलि ढिलो चुनावी प्रचार अभियानलाई थाल्ने भएका छन् । पार्टि केन्द्रले प्रचार सामाग्री तथा घोषणा पत्रको निर्माण प्रक्रियामा रहेकाले औपचारिक रुपमा जनताको माझमा जान नसकिएको क्षेत्रीले बताए । दोस्रो चरणमा हुने निर्वाचनको मनोनयन दर्तापछि पार्टिले आधिकारिक प्रचार सामाग्री जिल्लामा पठाउने र त्यसपछि औपचारिक रुपमा प्रचार अभियान थालिने क्षेत्रीले बताए ।
अनौपचारिक प्रचार–प्रसारमा लागिएको भएपनि पार्टिले औपचारिक रुपमा निर्देशन दिएपछि मात्रै प्रचारमा लाग्ने उनको भनाई थियो । एकीकृत राष्ट्रिय प्रजातन्त्र पार्टी (राष्ट्रवादी) पनि प्रचार अभियानको तयारीमा नै व्यस्त छ । समय प्रशस्त रहेकाले अझै केही दिन ढिलो गरेर आफ्नो औपचारिक प्रचार अभियान थाल्ने राप्रपाले जनाएको छ । ‘प्रचारमा जाने भनेर बिना तयारी जाने कुरा आएन’ जिल्ला अध्यक्ष शैलेन्द्र कुमार श्रेष्ठले भने ‘जिल्ला तहमा तयारी भैरहेको छ, केही दिनमा सम्बन्धित सबै क्षेत्रलाई खबर गरेर औपचारिक प्रचारमा लाग्छौं ।’ पार्टिको प्रचार सामाग्री, यातायात लगायतका प्रचारका लागि आवस्यक सबै खालका सामाग्रीको तयारी गरेर प्रचारमा लाग्ने उनले बताए । ‘जनता बाठा छन् कि छैनन् भनेर जाँच्ने बेला आएको छ’ श्रेष्ठले भने ‘उत्तम उम्मेदवार छान्न जनताले मौका दिनु पर्छ ।’