प्रचार शैली फेर्दै राजनीतिक दल, सभा छोडेर घरदैलो प्राथमीकतामा ।

बागलुङ, १५ कार्तिक–आमसभा राखेर सबै नेताले भाषण गर्ने शैली फेरेर आसन्न निर्वाचनमा बागलुङका राजनीतिक दल र उमेदवारहरुले घरदैलोलाई प्राथमिकता दिएका छन् । घरदैलोमा पुगेर आफ्ना चुनावी मुद्दा बताउने, मत हाल्न सिकाउने लगायतको काम गर्न थालेका हुन् । किसानले खेती थन्क्याउने समय भएकोले आमसभा गरेर नहुने उनीहरुले निष्र्कष निकालेका छन् । ‘भाषण गरेर भन्दा जनताको घरदैलोमा पुगेर मत माग्ने गरी हिडेका छौं’ बागलुङ क्षेत्र नं. २ का कांग्रेस उमेदवार निरज पुनले भने, ‘उनीहरुको सुखदुःख के–के छन् बुझ्ने मौका पनि पाएको छु ।’ आमसभामा आएका सर्वसाधारणले भाषण सुन्न नचाहेको बुझेपछि मत माग्ने प्रकृया फेरेको उनले बताए ।
धान र कोदो थन्क्याउने समय भएकोले किसानहरु अधिकांस खेतमै भेटिने गरेका छन् । बिहान बेलुकी घर र दिउसो खेतमा भेटिएका मतदातालाई बिकास निर्माणको काम बारे आश्वासन दिने, आवस्यकता टिपाउने र संभव भए नभएको स्पष्ट पार्ने काम भएको समेत पुनले बताए । भौगोलिक रुपमा ठूलो क्षेत्र भएकोले भाषणको कार्यक्रम राख्दा एउटै गाउँमा दिन बित्ने समस्या पनि उनले सुनाए । घरदैलोलाई अन्य दलका नेताहरुले पनि गरेका छन् । बाम गठबन्धनका सूर्य पाठकले क्षेत्र नं. १ मा एकादुइ स्थानमा भाषण र अधिकांस स्थानमा घरदैलो गरिरहेका हुन् । कार्यकर्तालाई बाँडेर दैनिक २ देखि ३ वटा गाउँमा पुगेर घरदैलो गरेको बताए ।
‘अघिल्ला चुनावमा भाषण बढी हुन्थे, अहिले घरदैलो चलेको छ’ पाठकले भने, ‘पाँच बर्षपछिका चुनावमा सामाजिक संजालकै भरमा प्रचार हुने संभावना देखिएको छ ।’ भाषण र आश्वासनको राजनीति भन्दा कामको राजनीतिमा जनता विश्वस्त हुने समेत उनले बताए । गरिवी निवारण तथा सहकारी राज्य मन्त्री चम्पा खड्काले पनि घरदैलोमा समय दिएकी छिन् । चुनाव चिन्ह पाएपछि गाउँ पसेकी खड्काका कार्यकर्ताले हाते पर्चा बनाएर मतदान गर्ने तरिका पनि सिकाएका छन् । निर्वाचन आयोगले कस्तो मतपत्र छाप्छ भन्ने यकिन नभएकोले सामान्य तरिका मात्र सिकाएको नेविसंघका अध्यक्ष खड्ग थापाले बताए ।
आवस्यक पर्चा र मतपत्रको अन्यौलताले जिल्ला निर्वाचन कार्यालयले मतदाता शिक्षा अभियान संचालन गर्न सकेको छैन । ‘मतपत्र र सामाग्री कस्तो आउने भन्ने अन्यौलले काम गर्न सकेका छैनौं’ जिल्ला निर्वाचन अधिकारी बिकासचन्द्र पौडेलले भने, ‘मतदाता शिक्षाका लागि परिचालक भने छनौट गरेर तालिमका लागि तयारी बनाएका छौं ।’ जिल्लामा १ सय ३ मतदान स्थलमा १ सय ९९ केन्द्र रहने भएकोले एक केन्द्रमा एक जना पर्ने गरी १ सय ९९ जना मतदाता शिक्षाका परिचालक छनौट गरिसकेको उनले बताए । दलका नेताले भने नमूना पत्र बनाएर प्रचार गरिरहेका छन् । मतपत्रको अन्यौलताले प्रचारमा समेत समस्या भएको हो । धेरै मत बदर हुने समस्यालाई कम गर्नका लागि प्रचार अभियान सहयोगी हुने कार्यकर्ताहरुको ठम्याई छ । त्यस्तै दलहरुले वृद्धवृद्धा देख्नासाथ आर्शिवाद माग्ने र त्यस्ता फोटोहरु सार्वजनिक गर्ने काम पनि थालेका छन् । चुनावी अभियानमा खिचेका फोटो सार्वजनिक गरेर आर्कषण बढाउने तथा लोकप्रिय बन्ने होडमा उनीहरु लागेका छन् ।