जैमिनी नगरका सडक धमाधम मर्मत

बागलुङ,३० असोज–बर्षात् रोकिएसँगै जैमिनी नगरपालिका–१ कुश्मीशेराले स्थानिय सडक मर्मतको कामलाई तीव्रता दिएको छ । बर्षात्को समयमा बिग्रिएका कच्ची सडक मर्मतको कामले तीब्रता पाएको हो । नगरपालिकाले विनियोजन गरेको बजेटको आधारमा उपभोक्ता समिती गठन गरेर सडक मर्मतको काम थालिएको जैमिनी–१ कुश्मीशेराका वडाध्यक्ष भुपेन्द्र थापाले बताए । वडा भित्रका सबै सडक मर्मत गरी सहज यात्राको व्यवस्था मिलाउन लागिएको थापाले बताए । कुश्मीशेरा बजारदेखी कुश्मीगाउँ सडक, प्रारथमिक स्वास्थय केन्द्रदेखी पोखरी र जुम्लीखोला सडक तथा सेरा बजारदेखी जैमिनीघाट सम्मका सडक मर्मतको काम थालिएको हो ।
डोजर लगाएर कामलाई तीब्रता दिईएको अध्यक्ष थापाले बताए । केही सडकमा काम चलिरहेको र एक दुई दिनमा नै सेराबजारदेखी जैमिनीघाट सम्मको काम सुरु गरिने वडा कार्यालयले जनाएको छ । जैमिनी नगरपालिकाका अधिकांश वडाको दाहसंस्कार हुने जैमिनीघाट जाने सेराबजार–जैमिनीघाट सडकको तत्काल काम सुरु गरिने अध्यक्ष थापाले बताए । कमजोर जमीनका कारण बर्षातको समयमा ठाउँ–ठाउँमा सडक भत्केका कारण पैदलयात्रु समेत आवतजावत गर्न कठिन रहेको यो सडक महत्वपुर्ण योजनामा राखेर मर्मतको काम थालिने थापाले बताए ।
निर्माण सम्पन्न भइसकेका सबै सडक मर्मतको कामलाई प्राथमिकतामा राखेको वडाले नयाँ ट्रयाक खोल्ने काम भने मंसीरपछि थाल्ने जनाएको छ । ‘हामीले पहिलो चरणमा मर्मतको काम सक्छौं’ थापाले भने– ‘सडक सञ्जालले नछोएका वडाका केही बस्तीमा नयाँ ट्रयाक खोल्ने काम मंसिरपछि सुरु हुन्छ ।’