मुक्तिनाथ जान हिडेकाको जिल्लामा चहलपहल

बागलुङ,२१ असोज–मुक्तिनाथ र मुस्ताङ भ्रमणको मौषम शुरु भएकोले आन्तरिक पर्यटक आगमन बढेको छ । यो क्रमले बागलुङमा पनि आन्तरिक पर्यटक बढेका छन् । भदौको अन्तिम सातादेखि नै बागलुङका अधिकांस होटलमा मुक्तिनाथ जान हिडेका स्वदेशी पर्यटकको भीड लाग्न थालेको छ । एक रात बसेपछि अर्को दिन सहजै मुक्तिनाथ पुग्न सकिने भएपछि स्थलमार्ग प्रयोग गर्ने अधिकांसले बागलुङको मार्ग रोज्न थालेका हुन् । दैनिक सिधा बस संचालन भएपछि बागलुङ कालिकाको दर्शन गरेर जोमसोम बस्न पुग्ने गरी आउने पर्यटकको संख्या बढेको होटल संघका अध्यक्ष निलेश राजभण्डारीले बताए ।
घोषित पदमार्ग नभएकोले बिदेशी पर्यटक भने छिटफुट मात्र आउने गरेका छन् । बिदेशी पर्यटकका लागि पोखरादेखि नयाँपुल, घोरेपानीहुँदै मुक्तिनाथ जाने पदमार्ग छ । नेपाली पर्यटकले भने काठमाण्डौ, चितवन, भैरहवा, बुटवल र गण्डकी अञ्चलका सबै जिल्लाबासीले बागलुङ आएर मात्र जाने योजना बुन्न थालेका हुन् । गत बर्षदेखि निर्माणाधिन धार्मिक पञ्चकोट समेत आन्तरिक पर्यटकको रोजाईमा पर्न थालेको छ । ‘मेरो होटलमा मात्र दैनिक १ सय जना पर्यटक आएका छन्’ होटल पिस प्यालेसका संचालक रहेका राजभण्डारीले भने, ‘मुस्ताङ जाने सिजन भएकोले बागलुङको पर्यटन व्यवसायमा प्रगती हुन थाल्यो ।’ यहाँका रेडएप्पल, समिट, शितल, दि राजन लगायतका होटलमा स्वदेशी पर्यटक खचाखच भएका हुन् । संघका अनुसार दैनिक बागलुङमा झण्डै ५ सय जनासम्म नेपाली पर्यटक आइरहेका हुन् । आएका मध्ये अधिकांस मुस्ताङ जाने योजनाका साथ आएका हुन् । अघिल्ला बर्ष दैनिक २ सयसम्म आउने गर्थे । दशैपछि आउने सयौं पर्यटकको बुकिङ समेत भैरहेको राजभण्डारीले बताए ।
धौलागिरी अञ्चल यातायात बस व्यवसायी समितिले दैनिक बागलुङदेखि जोमसोमका लागि बस छुट्ने व्यवस्था गरेको छ । केही बर्ष अघिसम्म रहेको यातायात क्षेत्रको सिण्डीकेट हटेपछि पर्यटकलाई सहज भएको छ । ‘आफ्नो रोजाईकै साधन लिएर जान पाईने भएकोले पहिलो दिनको बसाई बागलुङमा बनायौं’ चितवनका रामकृष्ण घिमिरेले भने, ‘दोश्रो दिन मुस्ताङ जाने, मुक्तिनाथ घुमेर फर्कंदा पोखरा वा चितवनसम्म पुग्न सकिने संभावना हुन्छ ।’ केही बर्षदेखि सडकको स्तरउन्नतीको काम भैरहेकोले मुक्तिनाथको यात्रा सहज पनि भएको हो । बेनीदेखि मुस्ताङहुँदै कोरला जाने कालीगण्डकी लोकमार्गको डिपिआर निर्माण भएर ठेक्काको काम समेत अगाडि बढेकोले मुक्तिनाथको यात्रा सहज हुँदै गएको हो । बागलुङ कालिका र पञ्चकोट भारतीय पर्यटकको पनि रोजाईमा पर्न थालेको छ । असोज लागेदेखि भारतीय पर्यटक पनि आउन थालेको समितिका अध्यक्ष उमेश केसीले बताए ।
‘राजधानीदेखि विभिन्न शहरमा बस, माईक्रोबस र जीपमार्फत सिधा यातायात जोडिएकोले भारतीय पर्यटकको पनि रोजाईमा बागलुङ छ’ केसीले भने, ‘जिल्लाको व्यवसायमा यो एउटा सफलताको सूचक हो ।’ पोखरादेखि हवाई मार्गमा जाने भारतीय र स्वदेशी पर्यटक पनि केही बागलुङको बाटो भएर फर्कन थालेका हुन् । ठूलो लगानी र आर्कर्षित गर्ने होटल समेत बन्न थालेकोले पर्यटक आउन थालेको राजभण्डारीले दाबी गरे । उनले आफ्नो होटलमा ‘मुस्ताङ प्रवेशको गेट बागलुङ’ भन्ने नारा पनि लेखेका छन् । छिटफुट रुपमा चिनिया पर्यटक पनि आउन थालेको व्यवसायीले बताए । पर्यटक आउन थालेकोले उनीहरुले धमाधम चिनिया भाषा सिक्न थालेको अर्का व्यवसायी तालबहादुर कुँवरले बताए ।