बागलुङ, २७ भदौ – स्थानीय निकाय पुनसंरचना प्राविधिक समितिले आयोगमा बुझाएको प्रतिवेदन प्रति असन्तुष्टी जनाउँदै यहाँका बासिन्दा आन्दोलित भएका छन् ।
पाण्डवखानी, रिघा, शिसाखानी र दगातुन्डाडा गाविस एउटै गाउँपालिकामा हुनु पर्ने भन्दै स्थानीयले चक्काजाम, विरोध प्रर्दशन लगायतको असन्तुष्टी प्रकट गर्न थालेका हुन् । चार गाविसको सर्वदलीय तथा सर्वपक्षिय वैठक गरि संघर्ष समिति समेत बनाएर विद्यालय, सरकारी कार्यालय, वजार, वन्द गर्ने चेतावनी समेत दिएका छन् । गत साउनमा यो क्षेत्रका आठ गाविसको भेलामा पाँच गाविसले खर्वाङ केन्द्र वनाउने, एक गाविसले जलजला वनाउने र दुई गाविस ले ग्वालीचौर केन्द्र वनाउनु पर्ने माग गरेका थिए । जिल्ला प्राविधिक समितिले भने बहुमतको कदर नगरी ग्वालीचौर केन्द्र बनाउने र पाण्डवखानीलाइ गलकोट क्षेत्रमा मिलाएपछि उनीहरु आन्दोलनमा उत्रेको समितिकी संयोजक बिना थापाले बताइन् ।
भौगोलिक, साँस्कृतिक, तथा ऐतिहासिक रुपमा एउटै प्रकृतिको भएपछि टुक्राएर स्थानीयको मर्म विपरितको काम गरेको उनीहरुले आरोप लगाएका छन् । संघर्ष समितिका तर्फबाट आइतवार जिविस र राजनैतिक दलका कार्यालयमा ज्ञापन पत्र वुझाएका छन् । राजनीतिक दलका प्रमुखहरुले पनि प्राविधिक त्रुटी भएको र सच्याउने आश्वासन दिएको बताइएको छ ।
खर्वाङमा हाल पाण्डवखानी, रिघा, शिसाखानी, जलजला, दगातुन्डाडा, रणसिंकिटेनी ग्वालीचौर, भिमगिठे हेर्ने गरि कृषि सेवा केन्द्र तथा इलाका वन कार्यालय, इलाका हुलाक कार्यालय रहेका छन् भने पशुसेवा केन्द्र, प्रहरी चौकी लगाएतका सेवा केन्द्रको रुपमा पनि खर्वाङलाई विकास गरिएको छ । जिविसको बागलुङ मातहतको झण्डै ५० करोड वढिको भौतिक संरचनापनि खर्वाङमा रहेको छ भने विभिन्न संरचना निर्माणको लागी सार्वजनिक जग्गा समेत रहेको छ ।
