प्रतिनिधि सभाका दुइ र प्रदेश सभाका ४ क्षेत्रमा, एमालेको परिवर्तित संगठन निर्माण

१० असोज, बागलुङ–नेकपा एमाले बागलुङले प्रतिनिधिसभा तथा प्रदेशसभा निर्वाचनलाई लक्षित गर्दै आफ्नो परिवर्तित ससांगठनिक संरचना सार्वजनिक गरेको छ । सोमबार बसेको जिल्ला कमिटीको बैठकले यस्तो निर्णय गरेको हो । पार्टिको स्थायी कमिटीले जारी गरेको अन्तरपार्टी स्तरिय निर्देशन–७ बमोजिम जिल्लाभरको सांगठनिक संरचना निर्माण गरिएको बैठकपछि अध्यक्ष इन्द्रलाल सापकोटाले जारी गरेको बिज्ञप्तीमा जनाईएको छ । एमालेको निर्णयअनुसार, प्रतिनिधिसभा निर्वाचन क्षेत्र नं १ का लागि लालबहादुर थापा संयोजक रहेको ७३ सदस्यीय समन्वय कमिटी गठन भएको छ ।
कमिटीमा विघटित निर्वाचन क्षेत्रीय कमिटी, साविक बागलुङ क्षेत्र नं १ र २ का पदाधिकारी तथा सदस्यहरु, पदेन सदस्य रहेको बिज्ञप्तीमा उल्लेख छ । त्यस्तै, प्रतिनिधिसभा निर्वाचन क्षेत्र नं २ का लागि बिष्णु भुसाल संयोजक रहेको ३९ सदस्यीय समन्वय समिती गठन गरिएको छ । त्यसमा विघटित निर्वाचन क्षेत्रीय कमिटी, साविक क्षेत्र ३ का सबै पदाधिकारी तथा सदस्यहरु र साविक क्षेत्र १, २ का पदाधिकारी तथा सदस्यहरु पदेन सदस्यमा रहने ब्यबस्था रहेको छ ।
राज्यको पुर्नसंरचना भएसँगै विगठित तिनवटै क्षेत्रका क्षेत्रीय कमिटीका सदस्यहरु नयाँ संरचनामा आउने गरी व्यवस्था गरिएको एमाले बागलुङले जनाएको छ । प्रदेशसभा निर्वाचन क्षेत्रमा पनि एमालेले समन्वय समिती गठन गरेको छ । गणेशबहादुर थापा मगर संयोजक रहेको  प्रदेशसभा निर्वाचन क्षेत्र नं १ मा २९ सदस्यीय समन्वय कमिटी गठन गरिएको छ । प्रदेशसभा निर्वाचन क्षेत्र नं २ मा धनबहादुर परियारको संयोजकत्वमा २९ सदस्यीय समन्वय समिती गठन भएको छभने प्रदेशसभा निर्वाचन क्षेत्र नं ३ मा शान्ति अधिकारीको संयोजकत्वमा ३० सदस्यीय समुन्वय समिती गठन गरिएको छ ।
त्यस्तै प्रदेशसभा निर्वाचन क्षेत्र नं ४ मा लक्ष्मण पुन मगरको संयोजकत्वमा २३ सदस्यी समन्वय समिती गठन भएको बिज्ञप्तीमा उल्लेख छ । प्रदेशसभा निर्वाचन क्षेत्र समन्वय समितीको सदस्यहरुमा सम्बन्धित क्षेत्रका नगर तथा गाउँ संगठन कमिटीका सचिवालय सदस्यहरु सदस्य रहने एमालेले जनाएको छ । त्यस्तै एमालेले उम्मेदवार हुन चाहने व्यक्तिले पार्टी जिल्ला कार्यालयले तयार गरेको उम्मेदवारहरुका लागि आवेदन फर्म भरि तोकिएको शुल्कका साथ उम्मेदवार दर्ता गर्नुपर्ने व्यवस्था गरेको बिज्ञप्तीमा उल्लेख छ ।