तार चुँडिदा १३ जना घाइते,घाइतेको पोखरामा उपचार

पर्वत/जिल्लाको मोदी गाउँपालिका–८ चित्रेमा नेपाल विद्युत प्राधिकरण ११ केभिएको हाइटेन्सन लाईन चुँडिदा २ स्कुले बालिका सहित १३ जना घाइते भएका छन् । घाइते मध्ये दुईको अवस्था गम्भिर रहेको छ । आइतबार दिउँसो ४ बजेको समयमा विद्युत प्रवाह भइरहेको लाइन चुँडिएर घरमा वितरण गरिएको तल्लो लाइनमा करेण्ट प्रवाह हुँदा १३ जना घाइते भएका हुन् ।
चित्रेको ओडारे, स्यानी उकाली र तोरिस्वाँरा गरी छुट्टाछुट्टै स्थानमा करेण्ट प्रवाह भएको थियो । करेण्ट अनियन्त्रित हुँदा बाटोमा पैदल यात्रु गरिएका दुई स्कुले विद्यार्थीसहित १३ जना घाइते भएका हुन् । घाइतेमध्ये स्कुलबाट घर फर्कँदै गरेका १२ बर्षिय आरती परियार र सन्तोषी विकको हात करेण्टले पुरै जलेको र शरिरका अन्य भागमा समेत करेण्ट लागेको स्थानीय पञ्चकोशी आधारभूत विद्यालयका प्रधानध्यापक मधुसुधन अधिकारीले जानकारी दिए ।
उनीहरुको अवस्था गम्भिर रहेकाले स्थानीयबासीहरुको प्रयासमा पोखरा तर्फ लैजाँदै गरिएको उनले बताए । जिल्ला प्रहरी कार्यालय पर्वतका प्रहरी निरिक्षक लिलाराज लामिछानेका अनुसार घटनास्थलमा प्रहरीको टोली जाँदै छ । अन्य घाइतेहरुको नाम खुल्न सकेको छैन । घटनाका सन्दर्भमा नेपाल विद्युत प्राधिकरण पर्वतका केन्द्र प्रमुख विजयराज रेग्मीले हाइटेन्सनको लाइन चुँडिएर घटना घटेको भन्ने बुझिएको घटनाबारे थप जानकारी नआइसकेको जानकारी दिए ।