बागलुङ, २६ भदौ – धौलागिरी अञ्चल यातायात बस व्यवसायी समितिले आगामी असोज ७ गते देखि बागलुङदेखि भारतको राजधानी दिल्लीसम्म सिधा बस सेवा संचालन गर्ने भएको छ । समितिले पत्रकार सम्मेलन गरेर बस सेवा संचालनका लागि अन्तिम तयारी भएको जानकारी दिएको हो ।
भारतीय पर्यटकलाइ नेपाल भित्राउने तथा भारतमा काम गर्ने नेपालीहरुको सेवालाइ ध्यान दिएर बस सेवा शुरु गर्न लागिएको समितिका अध्यक्ष कुमार खड्काले जानकारी दिए । मोर्डन इरा टुर्स एण्ड ट्राभल्स प्रालिको सहकार्यमा समितिले संचालन गर्ने बसले धौलागिरीका बासिन्दा सहित पोखरा, नारायणगढको बाटो संचालन हुने बताइएको छ ।
यो सेवाले धौलागिरीको पर्यटनको क्षेत्रमा महत्वपूर्ण योगदान पुग्ने समेत सरोकारवालाहरुले बताएका छन् । पत्रकार सम्मेलनमा पृथ्वी राजमार्ग बस संचालक समितिका अध्यक्ष मीनबहादुर शाहीले दुइ समितिको सम्बन्ध सुधार गर्दै व्यवसायिक हितमा काम गर्नका लागि पनि यो अभियानलाइ पृथ्वी राजमार्ग संचालक समितिले समेत सकारात्मक लिएको बताए ।
केही महिना अघि पोखरा देखि पनि नियमित बस संचालनमा आइरहेको छ । पहिलो चरणमा समितिले बागलुृङ देखि आइतवार, बुधवार र शुक्रवार बस छुट्ने व्यवस्था गर्ने भएको हो । यात्रुको आवस्यकताको आधारमा यो क्रम बाक्लो बन्ने विश्वास व्यवसायीले बताए ।
१ हजार ३ सय किमी टाढाको दिल्लीका लागि भारतीय रुपैयाँ २ हजार अर्थात नेपाली रुपैयाँ ३ हजार २ सय रुपैयाँ भाडा तोकिएको छ ।
