सामाजिक सेवाः ज्येष्ठ नागरिकलाई राहत

बागलुङ, २० भाद्र – आर्थिक संकटका कारण कसैले अकालमा ज्यान गुमाउन नपरोस् भन्ने उद्देश्यले धौलागिरी अञ्चल अस्पतालमा स्थापना गरिएको सामाजिक सेवा एकाईमा सेवा लिनेको संख्यामा वृद्धि हुँदै गएको छ ।
अस्पतालले २०७२ चैतमा संचालनदेखि ल्याएको उक्त सेवा एकाईमा आर्थिक वर्ष २०७४ को साउन महिनामा मात्र २ सय ८३ जनाले सेवा लिएका छन् । जसमध्ये १ सय ५७ जना महिला र १ सय २६ जना पुरुषले सो ईकाइबाट सेवा लिएका छन् ।
जसअन्र्तगत जेष्ठ नागरिकहरु २ सय ६७ जना, गरिब ८ जना, अपाङ्गता भएका व्यक्तिहरु ५ जना र महिला स्वयंसेविकाहरु ३ जना रहेको सामाजिक सेवा एकाई बागलुङका इन्चार्ज तिर्थ गौतमले जानकारी दिए । उक्त एकाईबाट साउनमा आर्थिक अवस्था कमजोर भएका र पोखरा रिफर गर्नुपर्ने भएपछि एकजना बिरामीलाई यातायात खर्च बापत २६ सय ५० रुपैयाँ सहयोग गरिएको इन्चार्ज गौतमले जनाए ।
त्यस्तै, आर्थिक वर्ष २०७३/०७४ मा एकाईबाट १ हजार १ सय ४७ जना पुरुष र १ हजार १ सय महिला जरी जम्मा २ हजार २ सय ४७ जनाले सेवा लिएको कर्मचारी सिर्जना कार्कीले जानकारी दिइन् । सेवा लिनेमा हालसम्म सवैभन्दा धेरै जेष्ठ नागरिकहरु रहेको सामाजिक सेवा एकाईले जनाएको छ । आव ०७३।७४ मा जेष्ठ नागरिकहरु २ हजार २७ जना, गरिव १ सय ३४ जना, अपाङ्गता भएका व्यक्ति ४७ जना, महिला स्वयंसेविका २० जना, असहाय ४ जना र अन्य ६ जनाले सेवा लिएको एकाईका इन्चार्ज गौतमले बताए ।
आर्थिक वर्ष ०७३।०७४ मा धौलागिरी अञ्चलमा उपचार सम्भवन नभएपछि पोखरा रिफर गरिएका आर्थिक अवस्था कमजोर भएका बिरामीहरुलाई ३४ हजार ५ सय २० रुपैयाँ सहयोग गरिएको छ । उक्त सेवाबाट आर्थिक अवस्था कमजोर भएका धेरै विरामीहरुलाई फाइदा पुगेको इन्चार्ज गौतमले बताए ।
अस्पतालमा गरिब, विपन्न तथा सिमान्तकृत समुदायहरुले निशुल्क सेवा लिन आउँदा नेपाल सरकारले जारी गरेको परिचय पत्र वा नागरिकताको प्रमाणपत्र वा अन्य कुनै परिचय पत्र वा स्थानीय निकायको सिफारिस लिएर आउनुपर्ने व्यवस्था गरिएको छ ।
असहायका लागि प्रहरीको सहयोग वा अन्य कुनै सामाजिक संस्था वा व्यक्तिको सहयोगमा आएकाहरुलाई निशुल्क उपचार गरिने व्यवस्था छ । यस्तै, अपाङ्गहरूको लागि अपाङ्गता परिचयपत्र र जेष्ठ नागरिकहरुको लागि सामाजिक सुरक्षा भत्ता पत्र तथा नागरिकताको प्रमाणपत्र अनिवार्य गरिएको भएपनि अवस्था हेरेर सेवा दिइएको इन्चार्ज गौतमले जानकारी दिए । अहिले सेवा केन्द्रबाट ७० भन्दा बढी औषधीहरु निशुल्क दिने गरिएको छ ।
एकाईले हाल सेवा प्रदान गरि रहेपनि अहिले मन्त्रालयबाट अख्तियारी आईनसेको इन्चार्ज गौतमले बताए । उनले मन्त्रालयबाट उक्त एकाई रहने जानकारी आएपनि के–के सेवा प्रदान गर्न सकिन्छ भन्ने अझै जानकारी प्राप्त नभएको बताए ।