काठमाडौं – अभिनेत्री रेखा थापा ३६ बर्ष लागेकी छन् । उनले आज आफ्ना नजिकका पत्रकार तथा चलचित्रकर्मीसँग जन्मदिनको खुसी साट्दै छिन् । नेपाली चलचित्र क्षेत्रमा अभिनेत्रीको मात्र नभएर निर्माता तथा निर्देशकको पनि छबि बनाएकी उनी आजबाट ३५ पुरा गरेर ३६ टेकेकी हुन् ।
पुर्बी नेपालमा जन्मिएकी रेखा सौदर्य प्रतियोगीता हँुदै अभिनयमा भित्रिएकी हुन् । नरेश पौडेलको निर्देशन तथा छबिराज ओझाको निर्माण रहेको चलचित्र ‘हिरो’बाट अभिनयमा डेब्यु गरेकी रेखाले कयौ हिट चलचित्र दिएकी छन् । पुरुषको एक्सन चल्ने समयमा एकाएक एक्सन गरेर चलचित्रमा नारी एक्सन भित्र्याउन सफल रेखाले करिब १५ बर्ष चलचित्र अभिनयमा बिताएकी छन् । बिभिन्न कारणले चर्चा रहन सफल अभिनेत्री रेखा केही अगाडिसम्म निर्माता छबिराज ओझाको कारणले चर्चामा छाउने गर्दथिइन् । उनको चर्चाको अर्काे बिषय अभिनेताहरुसँगको सम्बन्ध पनि हो ।
अभिनेता राजेश हमालदेखि निखिल उप्रेती, विराज भट्ट, आर्यन सिग्देल लगायतसँगै काम गरेको कुनैपनि हिरोसँग उनको राम्रो सम्बन्ध रहन सकेन । स्टारडमको घमन्ड गर्दै सबैसँग सम्बन्ध बिगारेकी रेखा अहिले सम्बन्ध सुर्धान तिर लागेकी छन् । किनभने केही समययता उनको चलचित्रले दर्शक तान्न सकेन । पछिल्लो समय उनी राजनीतिका कारणले पनि चर्चा छिन् । नेकपा माओबादीबाट कमल थापाको कारणले राप्रपा प्रवेश गरेकी रेखा अहिले राम्रपाका अर्का नेता पशुपतिशम्शेर राणा तिर ढल्किएकी छन् । यता र उता भौतारिने शैलीले उनको राजनीतिक करियर अझै अन्योलग्रस्त नै रहेको अनुमान गर्न सकिन्छ ।
पछिल्लो समय उनी राजनीति र अभिनय एकसाथ अगाडि बढाइरहेकी छन् । निर्माणमा पनि सक्रिय उनको पछिल्लो चलचित्र ‘रुद्रप्रिया’ कात्तिक २ गते रिलिज हुँदैछ । यो चलचित्रले फेरी आफ्नो स्टारडम फर्काउने उनको बिस्वास छ ।
