बागलुङ, ३ असोज- एशियाकै ठूलो भनेर दावी गरिएको टुनीको रुख मंगलवार विहान ढलेको छ । बागलुङ नगरपालिका १ रामरेखा स्थित रहेको टुनीको रुख अचानक ढल्ला जिल्लाबासी अचम्ममा परेका छन् ।
लिखित तथ्यांक नभएपनि ७ सय बर्ष पुरानो मानिएको बागलुङ नगरपालिका–१ रामरेखामा रहेको टुनीको रुख ढलेपछि सयौं हेर्न पुगेका थिए । स्थानीयका अनुसार कम्तिमा सात पुस्ता देखि यो रुखको फेदमा सुन झाँक्री र ब्रम्हझाँक्रीको पूजा गरिंदै आइएको थियो ।
रुख ढलेको शोकमा रामरेखाका सयौंले मंगलवार नुहाएर निराहार समेत बसेका छन् । २०५६ सालमा उक्त रुख मुनी झाँक्रीको मन्दिर पुन निर्माण गरिएको थियो । तीन बर्षअघि हावाहुरीले एक भाग ढलेको यो रुखको बाँकी भाग जरै समेत मंगलबार ढलेको थियो ।
सुन झाँक्रीको मन्दिर सँगैको यो रुखमा रामरेखाबासीले हरेक बर्ष उधौली र उभौली तथा फागुनको पहिलो साताको शनिवार कुल पूजाको रुपमा झाँक्रीको पूजा गर्दै आएका थिए । यो रुख ढल्दा सयौं बर्षको इतिहास समेत ढलेको स्थानीयले अनुमान गरेका छन् । ‘धार्मिक आस्थाको कारण यो रुख बर्षौदेखि ठडिएको थियो’ स्थानीय सुन झाँक्री व्यवस्थापन समितका अध्यक्ष सूर्यबहादुर बोहोराले भने, ‘जिल्लाको पहिचान बोकेको रुख ढल्दा हाम्रो इतिहास पनि ढलेको छ ।’ यो इतिहासलाई जोगाई राख्नका लागि पुनःनिर्माण मार्फत सुनझाँक्रीको मन्दिर बनाउन जरुरी छ । यो रुखले झण्डै २ रोपनीजमिन समेत ओगटेको थियो । हाल पक्की घेराबार लगाएर मन्दिरको रुपमा पूजा गरिएको स्थान पनि १ रोपनी छ ।
रुख ढल्दा बागलुङमा प्रसारण भएको विद्युत मंगलवार बिहानै देखि अवरुद्ध भएको छ । ढलेको रुख पन्छाएर विद्युत तथा अवरुद्ध सडक संचालनका लाग नेपाल प्रहरी र सेनाका जवान खटेका थिए । मंगलवार अपरान्ह सम्म रुख पन्छाएर विद्युत संचालन गर्न सकिने विद्युत प्राधिकरणले जनाएको छ । ढलेको रुखको पुरै भाग हटाउनका लागि भने एकसाता बढी लाग्ने अनुमान गरिएको छ ।
