२२ लाखको लगानीमा बन्यो आकर्षक पार्क

बागलुङ, ३ असोज-बजारको हिलो, धुलो र कोलाहलबाट विश्राम लिएर केही समयका लागि घुम्न चाहनेका लागि बागलुङ नगरपालिका १ रामरेखामा नयाँ पार्क संचालनमा आएको छ । रामरेखा निवासी भारतीय सेनाका निवृत्त क्याप्टेन धनबहादुर बोहोराले व्यक्तिगत खर्चमा उक्त पार्क निर्माण गरिदिएका हुन् । सोमबार एक कार्यक्रमका बिच बागलुङ नगरपालिकाका प्रमुख जनकराज पौडेलले उक्त पार्कको उद्घाटन गरे । भारतीय सेनाबाट निवृत्त भएका बोहोरा लामो समय देखि सामाजिक सेवामा लाग्दै आएका छन् । उनले व्यक्तिगत २२ लाख रुपैयाँ खर्चेर उक्त पार्क निर्माण गरिदिएका हुन् । उक्त पार्कमा शिव पार्वतीको मन्दिर, महिला तथा पुरुष शौचालय, बिश्राम गर्ने स्थानहरु, पोखरी, खानेपानीको ट्यांकी र धाराहरु समेत जडान गरिएको छ । झण्डै ५ रोपनी क्षेत्रफलको सार्वजनिक जमिन विना काममा फालिएको थियो । उक्त जमिनलाई सदुपयोग गर्ने गरी पार्क निर्माण गरिएको हो । साथै उक्त पार्कबाट धौलागिरी हिमाल, कालीगण्डकी नदीको मनोरम दृश्य समेत देख्न सकिन्छ । ‘बजारक्षेत्रमा बढ्दो जनघनत्व र पार्कको अभाव देखेपछि खाली जमिनलाई सदुपयोग गर्ने चाहना पलायो’ बोहोराले भने, ‘युवा र प्रौढले पनि घुमेर आनन्द लिन मिल्ने स्थानको रुपमा विकास गर्ने योजना छ ।’ उनले यो पार्कलाई अझै व्यवस्थित बनाएर भीर तर्फ पर्खाल लगाउने, फुलवारी बनाउने तथा जीर्ण रुपमा रहेको मंकाखलको भवनलाई व्यवस्थित बनाएर सामुदायिक प्रहरी राख्ने व्यवस्था मिलाउन स्थानीय सँग छलफल गरेको बताए । प्रहरी बसेमा सुरक्षामा सहयोग पुग्ने स्थानीयले पनि विश्वास व्यक्त गरेका छन् । दैनिक सरसफाई गर्ने र बजारको गहनाको रुपमा लिन सकेमा पार्कले पर्यटक आर्कषण पनि गर्ने पनि विश्वास लिइएको छ । यस अघि रामरेखा स्थित टुनीबोट नजिकै मनिलाल बोहोराका ५ भाई छोराहरुले पनि २० लाख खर्चेर भ्यू प्वाईन्ट निर्माण गरेका थिए । उक्त प्वाईन्टमा पनि दैनिक सयौंको संख्यामा बजारबासी घुम्न जान्छन् । बिहान र बेलुकीको समयमा पुगेर शिलत स्थानमा बस्ने, शान्त वातावरणमा बसेर फ्रेस हुने समेत गर्छन् । पछिल्लो समयमा रामरेखाको डिललाई पर्यटकीय स्थानको रुपमा विकास गर्न पनि स्थानीयहरु सक्रिय भएका छन् । रामरेखाकै डिलमा कांग्रेसले विपि स्मृति पार्क पनि निर्माण गर्न थालेको छ । अघिल्लो बर्ष साउनमा वृक्षा रोपण गरेको उक्त स्थानमा आधुनिक पार्क सहितको वगैचा पनि निर्माण गर्ने योजना बनाएको छ । भीरको रुपमा चिनिने स्थानलाई पार्क बनाएर बजारबासीलाई घुम्ने स्थान बनाएपछि रामरेखाको व्यवसायमा पनि सुधार हुन थालेको स्थानीयले बताए । बांगेचौरदेखि क्यामपसको छात्रावास सम्मको झण्डै ३ किमी खण्डमा विभिन्न योजनाहरु पनि निर्माण भैरहेका छन् । मध्यपहाडी लोकमार्गको प्रस्तावित ट्रयाकको रुपमा पनि हेरिएको यो सडककै छेउमा खानेपानी ट्यांकी, वृक्षा रोपण, पार्क जस्ता पूर्वाधार बनाइएको हो । क्याप्टेन धनबहादुर बोहराको अध्यक्षतामा सम्पन्न भएको कार्यक्रममा मेयर जनक पौडेल, नेकपा एमालेका वैकल्पिक केन्द्रिय सदस्य गोविन्द नेपाली, नेपाली कांग्रेसका नगर सभापति महेन्द्र आचार्य, कार्यपालिका सदस्य लक्ष्मी बोहरा, पत्रकार महासंघका अध्यक्ष दिल शिरीष, रामरेखा सामुदायिक वन उपभोक्ता समितिका अध्यक्ष चतुरबहादुर बोहरा लगायतले बोलेका थिए ।