साहित्यकार प्रधानलाई सम्मान

बागलुङ, ७ असार – साहित्यकार तथा पत्रकार प्रमोद प्रधानलाई धौलागिरी साहित्य प्रतिष्ठानले सम्मान गरेको छ ।
बागलुङमा संचालित ५ दिने पत्रकारिता तालिमको सहजीकरणका लागि प्रधान आएको समयमा यात्रा आफ्नै परिवेश नामक अभियानको ३४ औं स्रष्टाको रुपमा सम्मान गरिएको हो ।
विशेषगरी २०५२ सालदेखि स्रष्टाको निवासमै पुगेर सम्मान गर्ने, रचना वाचन गर्ने र साहित्यीक भेटघाट गर्ने गरी अभियान शुरु भएको थियो । यो अभियान अन्र्तगत प्रधानले तालिम संचालन गरिरहेको होटल पिस प्यालेसलाईनै उनको बासस्थान मानेर कार्यक्रम आयोजना गरिएको हो । उक्त अवसरमा प्रतिष्ठानका अध्यक्ष काजी रोशनले प्रधानलाई सम्मानपत्रले सम्मानित गरेका थिए ।
साथै उनले स्रष्टाको सम्मानमा गरिएको कार्यक्रममाले आपसी भातृत्व र माया बढाएको बताए । कार्यक्रममा सम्मानित प्रधानले पनि नयाँ अवसर पाएको बताए । साथै उनले नेपाली बाल साहित्य र पत्रकारितामा कलम चलाउने क्रममा प्रकाशित कृतिले देशभर चिनाएको बताए ।
प्रधानले नेपाली निवन्ध, बाल साहितय र ईतिहासको क्षेत्रमा धेरै कलम चलाएका छन् । हाल उनी अभियान दैनिकको संपादकको रुपमा पनि कार्यरत छन् ।
प्रतिष्ठानका सचिव राम थापा अविरलको संचालन, ३२ औं स्रष्टा धनराज सापकोटाको अध्यक्षता र सदस्य गुणराज पोडेलको स्वागतमा सम्पन्न कार्यक्रममा पत्रकार तथा साहित्यकार बिष्णुप्रसाद शर्मा, दिल शिरिष, मुकेश राज भण्डारी, कोपिला कंडेल तथा गोविन्द सुवेदीले पनि बोलेका थिए । सहभागिले रचना वाचन पनि गरेका थिए ।