श्रीलंकामा भीषण बाढीपहिरो, १०३ को मृत्यु, ११३ बेपत्ता

एजेन्सी
कोलम्बो, १४ जेठ – श्रीलंकाका विभिन्न ठाउँमा आएको बाढीपहिरोमा १ सय ३ जनाको मृत्यु भएको छ । प्रकोप व्यवस्थापन केन्द्रका अनुसार बाढीपहिरोमा परी १ सय १३ जना हराइरहेका छन् भने ८ सयभन्दा बढी घर क्षतिग्रस्त भएका छन् ।
मृत्यु हुनेमध्ये ३८ जना कालुतारा र ४६ जना रत्नापुरा जिल्लाका छन् । अधिकारीहरूका अनुसार देशको दक्षिणी तथा पश्चिमी क्षेत्रको १३ जिल्लाका २४ हजार मानिस घरबारविहीन भएका छन् ।
गत बिहीबार आएको भीषण वर्षापछिको बाढीपहिरोले देशभर २ लाखभन्दा बढी मानिस प्रभावित भएका छन् । यो १४ वर्षयताकै सबैभन्दा ठूलो बाढी भएको बताइएको छ । यसअघि सन् २००३ को मे महिनामा आएको बाढीपहिरोबाट २ सय ५० जनाको मृत्यु भएको थियो ।
सैनिक प्रवक्ता रोशन सेनेभिरत्नेले ४ सय सैनिकहरू प्रहरी तथा उद्धार संस्थालाई सहयोग गर्न डुंगा तथा हेलिकोप्टरसहित खटाइएको बताए । अधिकारीहरूले थप बाढीको आशंकामा दुइटा प्रमुख नदीका तल्लो तटीय क्षेत्रमा बस्ने मानिसलाई सुरक्षित स्थानतर्फ जान निर्देशन दिएका छन् ।
प्रहरी प्रवक्ता प्रियन्था जायाकोडीले दक्षिणी पश्चिमी जिल्ला कालुतारा सबैभन्दा बढी प्रभावित भएको र त्यहाँ कम्तीमा पनि ५ वटा पहिरो गएको बताए । मृतकहरूको संख्या बढ्दै गएपछि सरकारले राष्ट्रसंघ तथा छिमेकी मुलुकसँग सहयोगका लागि अपिल गरेको छ । घाइतेहरूको उपचारका लागि भारतबाट स्वास्थ्यकर्मीको टोली शनिबार कोलम्बो आइपुगेको छ भने आपत्कालीन सहयोग पनि भारतले पठाएको छ । पीडितहरूलाई राख्न १ सय ८५ वटा शिविर बनाइएका छन् ।
श्रीलंकाको कालुतारा जिल्लामा पीडितको उद्धार गर्दै उद्धारकर्मी । सीएनएन