युभेन्टसले रच्यो इतिहास

रोम, ९ जेठ-युभेन्ट्सले इटालियन लिगमा नयाँ इतिहास बनाएको छ । आइतबार राति लिगको पुछारबाट तीन स्थान माथि रहेको क्रोटोनलाई ३–० ले पराजित गर्ने क्रममा युभेन्ट्सले लगातार छैटौं पटक उपाधि जितेको हो । मारियो मान्डजुकिकले आफ्नो ३१ औं जन्मदिन मनाउने क्रममा १२ मिनेटमा हुँवा क्वाड्राडोको क्रसमा पहिलो गोल गरेका थिए । दोस्रो गोल अर्जेन्टिनी युवा स्ट्रकर पाउलो डायबालाले फ्रिकिकमार्फत ३९ मिनेटमा गरे । तेस्रो गोल एलेक्स सान्ड्रोले ८३ मिनेटमा गरेपछि युभेन्ट्सले रोमासँगको दुरी ४ अंकमा राख्दै एक खेल खेल्न बाँकी रहँदा उपाधि चुम्यो । युभेन्ट्स गत साता नै लिग उपाधि नजिक थियो । तर, दोस्रो स्थानमा रहेको रोमासँग ३–१ ले पराजित भएपछि एक साता कुर्नु पर्यो। युभेन्ट्सले ३७ खेलमा ८८ अंक बटुलेको छ। रोमा ८४ मा सिमित भयो। ऊ नेपोलीभन्दा १ अंकले माथि छ । मासिमिलियानो अलेग्रीको प्रशिक्षणमा रहेको युभेन्ट्सले गत साता लाजियोलाई २–० ले पराजित गर्दै इटालियन कपको उपाधि पनि उचालेको थियो। अलेग्री अहिले ७ वर्षअघि पोर्चुगिज प्रशिक्षक जोसे माउरिन्होले एउटै सिजन इन्टर मिलानलाई तीन वटा उपाधि जिताएको इतिहास नजिक छन् । माउरिन्होले २०१० मा इन्टरलाई सिरिया, इटालियन कप र च्याम्पियन्स लिगको उपाधि जिताएका थिए । अलेग्री आउँदो जुन ३ मा कार्डिफमा हुने च्याम्पियन्स लिगको फाइनलमा रियल म्याड्रिडसँग भिड्ने तयारीमा छन् । उनको नेतृत्वमा युभेन्ट्सले लगातार तेस्रो पल्ट सिरिया उपाधि जितेको हो ।
रियलले जित्यो ला लिगा
रियल म्याड्रिडले ५ वर्षपछि स्पेनिस ला लिगाको उपाधि जितेको छ । आइतबार राती (नेपाली समयअनुसार सोमबार बिहान) सम्पन्न खेलमा क्रिस्टियानो रोनाल्डोले २ मिनेटमा गरेको गोलका कारण मालागालाई उसैको मैदानमा २–० ले पराजित गर्दै रियलले उपाधि जितेको हो । रियललाई उपाधिका लागि १ अंक मात्र आवश्यक थियो। बार्सिलोनाले अर्को खेलमा एइबारलाई ४–२ ले पराजित गरेपनि रियलले ३ अंकको स्पष्ट अग्रता बनाउदै २०१२ पछि स्पेनिस ला लिगाको उपाधि जित्यो । रियललाई उपाधि दिलाउन रोनाल्डोबाहेक करिम बेन्जेमाले ५५ मिनेटमा अर्को गोल थपे। रियलले यो सिजन ३८ खेलमा ८३ अंक जोडेको छ । बार्सिलोना भने ८० अंक जोड्दै दोस्रो स्थानमा रहयो । बार्सिलोनाले अन्तिम खेलमा लिओनल मेसीको २ गोलमा एइबारलाई पराजित गर्यो। पहिलो हाफमा १ गोलले अग्रता बनाएको एइबारविरुद्ध मेसीले ७५ मिनेटमा पेनाल्टी र ९० पछि थप गरिएको दोस्रो मिनेटमा गोल गरेका थिए । टाकासी इनुले खेल सुरु भएको ७ र ६१ मिनेटमै गोल गर्दै बार्सिलोनालाई स्तब्ध तुलाउने प्रयास गरे । –एजेन्सी