बागलुङ, ९ जेठ-बागलुङ नगरपालिकाका नब निर्वाचित नगर प्रमुख वडा अध्यक्ष र सदस्यहरू लाई रात्माटा बिकास समाजले सोमबार एक कार्यक्रमको आयोजना गरी स्वागत गरेको छ । नगर प्रमुख जनकराज पौडेल, वडा नम्बर ३ का वडा अध्यक्ष लक्ष्मी बास्कोटा, वडा सदस्य कमल खड्का, रोशन खड्का, दुर्गादेबी शर्मा र रेबती किसानलाई रात्माटा बिकास समाजका अध्यक्ष कबिन्द्र सापकोटा लगायतले फूलमाला अबिर लगाएर स्वागत गरेका थिए । कार्यक्रममा बोल्दै नगर प्रमुख जनकराज पौडेलले बागलुङ नगरपालिकाले आयोजना गर्ने कुनैपनि कार्यक्रममा मदिरा प्रयोग नगर्ने, बागलुङ नगर क्षेत्र भित्र ई–रिक्सा संचालनको अनुमति दिएर जनतालाई सेवा दिने बताए । स्वागत कार्यक्रममा वडा अध्यक्ष लक्ष्मी बास्कोटा, रात्माटा बिकास समितिका हिममाल शर्मा, मुरारीदत्त शर्मा, नेकपा एमालेका पुनम शर्मा लगायतले बागलुङ नगरको समुन्नत विकास गरेर देखाउने दायित्व सबैको भएको धारणा ब्यक्त गरेका थिए । रात्माटा विकास समाजका अध्यक्ष कबिन्द्र सापकोटाको अध्यक्षता, स्वागत रामचन्द्र शर्मा र कार्यक्रम संचालन बालकृष्ण शर्माले गरेका थिए । यसैबीच, बरेङ गाउँपालिका वडा नम्वर २ साविकको हुग्दिशीर वडा नम्वर १ तङ्ग्राङमा सोमबार एक कार्यक्रमका बीच बरेङ गाउँपालिकाका प्रमुख तथा उपप्रमुखलाई स्वागत गरिएको छ । बैशाख ३१ गते सम्पन्न प्रथम चरणको स्थानिय निकायको निर्वाचनमा राष्ट्रिय जनमोर्चा तथा नेकपा एमालेका तर्फबाट विजयी बरेङ गाउँपालिकाको प्रमुख कृष्णप्रसाद शर्मा र उपप्रमुख दिल कुमारी पुनलाई फुलमाला र अविर लगाएर स्वागत गरिएको हो । कार्यक्रममा बोल्दै प्रमुख तथा उपप्रमुख शर्मा र पुनले गाउँपालिकालाई नमुना बनाउने भन्दै त्यसका लागि जनताको साथ आवश्यक रहने बताएका थिए । यसैबीच, लामो समय विद्यालयको हक हितमा काम गर्दै आएका स्थानिय तहको निर्वाचनमा विजयी भएसंगै जनहित माध्यमिक विद्यालय गलकोट नगरपालिका–७ मल्म बागलुङले नेकपा माओवादी केन्द्रका विजयी जनप्रतिनिधिलाई सोमबार स्वागत तथा बधाई ज्ञापन गरेको छ । स्वागत तथा बधाई ज्ञापन कार्यक्रममा विजयी उमेदवारहरुलाई खादा र अविरद्वारा बधाई तथा शुभकामना प्रदान गरिएको थियो । स्वागत कार्यक्रममा बोल्दै नेकपा माओवादी केन्द्रका नवनिर्वाचित वडा अध्यक्ष सुवेदार टिका बहादुर थापा, सदस्यहरु मिना दर्जी, पदमा नेपाली, लोकबहादुर थापा र दलबहादुर थापाले जनताले प्रदान गरेको अमुल्य मतलाई खेर नजाने गरि सम्वृद्व वडा बनाउँदै वडा नं ७ को शैक्षिक क्षेत्रको विकासमा समेत जोड दिने बताएका छन् । साथै नवनिर्वाचित वडा अध्यक्ष थापाले आफनो सुरुको महिनाको तलबको रकम विद्यालयलाई अक्षयकोष स्थापना गर्ने समेत घोषणा गरेका छन् । सो अवसरमा विजयी जनप्रतिनिधिलाई विव्यस सदस्य ज्ञानबहादुर थापा र विद्यालयका प्रधानध्यापक विष्णुप्रसाद गौतमले बधाई मन्तव्य राखेका थिए । विद्यार्थी, शिक्षक, विद्यालय व्यवस्थापन समितिका पदाधिकारीहरु, शिक्षक अभिभावक संघका पदाधिकारीको उपस्थिती रहेको थियो ।
