बागलुङ, ८ जेठ-बागलुङ नगरपालिका वडा नम्वर ३ नागरोडमा आइतबार जमिन भाँसिएको छ । भाँसिने खालको भू–बनोट रहेको उक्त बस्तीमा पहिले–पहिले पनि भाँसिने गरेको स्थानीयहरुले बताएका छन् । एक्कासी जमिन भाँसिएपछि प्रमुख जिल्ला अधिकारी र जिल्ला प्रहरी कार्यालय बागलुङका प्रमुखको टोली घटना स्थलमा पुगेको थियो । बाक्लो बस्ती रहेको नागरोडमा बस्तीहरुलाई तत्कालका लागि खतरा नरहेको र अरु ठाउँमा पनि भाँसिएको खण्डमा खतरा हुने जिल्ला प्रहरी कार्यालयका प्रहरी उपरिक्षक चन्द्रकुवेर खापुङले बताए । भू–बनोट कमजोर खालको भएकाले भाँसिएको तर तत्काल आत्तिनु पर्ने अवस्था नरहेको खापुङले बताए । तत्काल खतरा देखिएका बस्तीका ३ घरहरु खाली गराएको प्रहरी उपरिक्षक खापुङले बताए । ३ घरमा बस्ने परिवारहरुलाई छिमेकी र आफन्तकोमा बस्ने व्यवस्था मिलाईएको छ । हालै सम्पन्न स्थानिय तहको निर्वाचनमा बागलुङ नगरपालिकाको मेयर र उपमेयरमा विजयी जनक पौडेल र सुरेन्द्र खड्काले समेत निरीक्षण गरेका थिए ।
