नगर र गाउँपालिकामा निर्वाचित जनप्रतिनिधिलाई सम्मान

म्याग्दी, ५ जेठ- नेपाली कांग्रेसले स्थानीय तहको निर्वाचनमा बेनी नगरपालिका, तीनवटा गाउँपालिका र वडास्तरमा विजय भएका जनप्रतिनिधिलाई सदरमुकाम बेनीमा भब्य स्वागत तथा मतदाता धन्यवाद दिएको छ । सदरमुकाम बेनीमा आयोजित विजय उत्सवमा नेपाली कांग्रेसका केन्द्रिय सदस्य अर्जुन प्रसाद जोशीले जनतालाई आश्वासन भन्दा पनि काम गरेर देखाउन पार्टी भएकाले स्थानीय तहको निर्वाचनमा म्याग्दीका मतदाताले कांग्रेसलाई रोजेको बताए । ‘म्याग्दी जिल्लालाई लालकिल्ला भन्थ्ये, अहिले सबैतिर चारतारे झन्डा देखिन्छ’ उनले भने । त्यस्तै नेपाली कांग्रेसका सांसद रेशम बहादुर बानियाँले मतदातालाई धन्यवाद दिदैं मतदाताको मतको आधारमा जनप्रतिनिधिहरुले काम गर्ने बताए । ‘यो अवसरलाई सद्ुपयोग गदैं अगामी दिनमा धेरै काम गर्नुछ’ बानियाँले भने । उनले विजयबाट उर्जा थपिएको बताउँदै यसैबर्ष हुने संघिय र संसदीय निर्वाचनमा जिल्लामा पहिलो दल बनाउने गरी काम गर्न समेत जनप्रतिनिधिहरुलाई अनुरोध गरे । त्यस्तै बेनी नगरपालिकाका नवनिर्वाचित मेयर हरिकुमार श्रेष्ठले मतदातालाई घरदैलोमै पुगेर धन्यवाद दिने कार्यक्रम समेत बनाउने बताए । उनले नगर क्षेत्रलाई नमुना बनाउने योजनाहरूमा अगाठी बढ्ने प्रतिबद्धता समेत जनाए । सोही कार्यक्रममा नेपाली कांग्रेसका खम्बीर गर्बुजाले मतदातालाई धन्यवाद दिदैं जनताको हितमा काम गर्ने गरी योजनाबद्ध तरिकाले जनप्रतिनिधिलाई सघाउने बताए । ‘उहाँहरू सबै म्याग्देलीको प्रतिनिधि हो, अव थप योजना सहित पराजित भएका क्षेत्रमा पुग्नेछौ’ गर्बुजाले भने । विजय उत्सव मनाउन नगरपालिकाका विभिन्न स्थानबाट कार्यकर्ता सदरमुकाम बेनीमा आएका थिए । बर्षाका कारण बजार परिक्रममा समस्या भएको थियो । कार्यक्रममा मालिका गाउँपालिकाका प्रमुख श्रीप्रसाद रोका, रघुगंगा गाउँपालिकाको प्रमुख भव बहादुर भण्डारी, नेपाली कांग्रेसका जिल्ला कार्यसमिति सदस्य माधव प्रसाद रेग्मी, नेता नेत्र बहादुर महत, अजय मिलन श्रेष्ठ, महिला संघकी अध्यक्ष विमला गौचनले मन्तब्य दिएका थिए । कार्यक्रमको सञ्चालन रमेश कुमार श्रेष्ठ र पार्टी सचिव मिन बहादुर कार्कीले सञ्चालन गरेका थिए ।
राप्रपाले बेनीमा विजय ¥यालीसहित खुशियाली मनायो
राष्ट्रिय प्रजातन्त्र पार्टी म्याग्दीले बिहीबार सदरमुकाम बेनीमा विजयउत्सव ¥यालीको आयोजना गरी खुशियाली मनाएको छ । स्थानीय तहको पहिलो निर्वाचनमा नेकपा एमालेसँग तालमेल गरी बेनी नगरपालिकामा चुनाब लडेको राप्रपाले उपमेयर पदमा जित हासिल गरेपछि विजय ¥यालीसहित खुशियाली मनाएको हो । बेनी नगरपालिकाको प्रथम उपमेयरमा निर्वा्चित राप्रपाका जिल्ला सहसचिव सन्जु थापा बरुवालसहितको टोलीले बेनीबजारमा बाजागाजाको साथमा बजारको परिक्रमा गरेको थियो । सोही अवसरमा नवनिर्वाचित उपमेयर थापा लगायतको टोलीले आफु र पार्टीलाई अमुल्य मत दिएर जिताएको भन्दै मतदातालाई बधाईज्ञापन गरेका थिए । कार्यक्रममा गाउँगाउँबाट राप्रपा समर्थित नेता, कार्यकर्ता र शुभेच्छुकहरुले सहभागीता जनाएका थिए । बजार परिक्रमापछि आयोजना गरिएको कार्यक्रममा बोल्दै भूपू राज्यमन्त्री एवं राप्रपाका केन्द्रीय सदस्य भीमप्रसाद गौचनले देशको राष्ट्रिय स्वाधीनताको रक्षाका लागि एमाले र राप्रपाबीचको गठबन्धन कायमै राखिने बताएका छन् । कार्यक्रममा नवनिर्वाचित उपमेयर सन्जु बरुवालले चुनाब प्रचारप्रसारका क्रममा गरिएका वाचाहरु पुरा गर्ने प्रतिबद्धता जनाउँदै आफ्नो अमुल्य मत दिएर जिताउने आम नगरवासीलाई धन्यवाद ज्ञापन गरेकी छिन् । राप्रपा जिल्ला अध्यक्ष विरबहादुर थापाको अध्यक्षता, सचिव दलकेशर बानियाँको स्वागत र प्रवक्ता हरिप्रसाद शर्माको सञ्चालनमा सम्पन्न कार्यक्रममा निवर्तमान जिल्ला अध्यक्ष एकेन्द्रबहादुर रावलले मन्तव्य राखेका थिए । झण्डै २० वर्षपछि भएको स्थानीय तहको पहिलो निर्वाचनका लागि म्याग्दीमा राप्रपाले एमालेसँग तालमेल गरी चुनाब लडेको हो । बेनी नगरपालिकाको उपमेयर पदमा राप्रपाबाट उम्मेदवारी दिएकी सन्जु बरुवालले ३ हजार ९९५ मत ल्याएर उपमेयरको चुनाबमा विजयी हासिल गरेकी थिइन् ।