बुटवल, १० बैशाख – स्थानीय तहको निर्वाचन दुई चरणमा हुने भएपछि दोस्रो चरणमा निर्वाचन हुने क्षेत्रका मतदाता र राजनीतिक दलका कार्यकर्तामा निराशा छाएको छ। बैशाख ३१ गते हुने भनिएको स्थानिय तहको चुनाब जेठ ३१ गतेका लागि सरेपछि त्यस क्षेत्रका कार्यकर्तामा अन्यौलता छाएको हो।
‘करिब २० वर्ष पछि चुनाब हुने भयो भनेर खुशी भएका थियौं। तर सर्यो भन्दा खिन्नता भइएको छ’ रुपन्देहीको तिलोत्तमा २ निबासी लोकनाथ ज्ञवालीले भने। अभिभावक संघका जिल्ला अध्यक्ष समेत रहेका उनले मिति सर्दा विद्यार्थीको पढाई समेत थप प्रभावित भएको बताए। ‘चुनाबकै कारण कक्षा ११ र १२ को परिक्षा तलमाथि भयो। पढाईमा थप अस्तव्यस्त बनाउने भयो’ उनले भने।
बुटवल कालिकानगरका बाबुराम नेपाललाई पनि चुनावको मिति सरेको नमजा लागेको छ। तर, आन्दोलनरत दलहरु पनि सहमतीमा आएपछि वातावरण सहज हुने सकारात्मक आशा पनि बढेर गएको उनले बताए। ‘चुनाबले खुशि नै बनाए पनि मधेशवादी दलका कारण चुनाब न्हुने हो की भन्ने शंका थियो, ढिलै भएपनि राम्रो वातावरणमा चुनाब हुने भयो’ उनी आशावादी देखिए।
यता स्थानीय तहको चुनाबको लागि तयारीलाई तिब्र पारेका राजनीतिक दलहरु पनि पछिल्लो समाचारले केही सुस्ताएका छन्।नगरपालीकाका प्रमुख र उपप्रमुख तथा गाउँपालिकाका अध्यक्ष तथा उपाध्यक्षको टुंगो लगाउन नेकपा एमालेको प्रदेश नम्बर ५ को प्रदेश कमिटी सचिवालयको बैठक शुक्रबारदेखी बसीरहेको छ। बुद्धजन्मस्थल लुम्बिनीमा बसीरहेको बैठकमा प्रदेश अन्तर्गतका अधिकांस स्थानीय तहको प्रमुख र उपप्रमुखको उमेद्वारको टुंगो लागिसकेको छ। एकदुई दिनभित्रै उमेद्वारको नाम सार्वजनिक गर्ने तयारी भएपनि पाँच नम्बर प्रदेशको चुनाब दोस्रो चरणमा हुने भएपछि अन्योल बढेको छ।
‘चुनाब सर्ने भएपछि त उमेद्वारको नाम सार्वजनिक गर्न केही ढीलाई हुन्छ होला’ एमाले रुपन्देही जिल्ला अध्यक्ष शिव सुवेदीले भने ‘पार्टीको चुनाब चिन्ह बोकेर कार्यकर्ताहरु घरदैलोमा हिडिरहेका थिए, अब कार्यकर्तामा पनि अन्योल छाएको छ।’
नेपाली कांग्रेसमा पनि वडा र गाउँ तथा नगर समितिबाट उमेद्वारको सिफारिस भएर माथिल्लो तहमा पुगी सेकेको थियो। अनौपचारीक छलफलहरु भने चलीरहेकै छन्।
सोमबार क्षेत्रीय समिति र संयन्त्रको बैठक बस्ने तय भएको छ। चुनाब पर धकेलिँदा उमेद्वारको टुंगो नलाग्न पनि सक्छ। ‘चुनाब सर्दा अन्योल बनाएको छ, तर उमेद्वारहरुको छिट्टै टुंगो लाग्छ’ कांग्रेस जिल्ला सचिव रामकृष्ण खाँणले भने।
नेकपा माओवादी केन्द्रले प्रदेश नम्बर ५ अन्तरर्गतका कतिपय जिल्लामा गाउँपालीका र नगरपालीकाका प्रमुख उपप्रमुखको उमेद्वार तोकिसकेको छ। तर रुपन्देहीमा उमेद्वारको टुंगो लगाउन आइतबार जिल्ला कमिटीको बैठक बस्ने तयारी थियो। ‘आज बैठक बसेर निर्णय गर्ने भनेका थियौं। चुनाब सर्ने भएपछि बैठक स्थगित गर्यौँ’ माओवादी केन्द्रका पोलिट्ब्युरो सदस्य माधब शर्माले भने।
उमेद्वारी टुंगो नलागेको ठाउँमा टुंगो लगाउन केही ढीलो गर्ने माओवादी केन्द्रको तयारी छ। ‘अहिले उमेद्वारी टुंगो लगाउने हो भने कार्यकर्ताले घेर्छन्, प्रचारप्रसारमा उमेद्वारहरुको खर्च पनि बढ्छ। त्यसैले चुनाब चिन्हको मात्र प्रचारप्रसारमा लाग्छौंँ।’ पोलिट्ब्युरो सदस्य शर्माले भने।यता जिल्ला निर्बाचन कार्यालयमा निर्बाचनको तयारी तिब्र छ। मुख्य निर्बाचन अधिकृतको कार्यालय स्थापना भइसकेको छ भने मतदाता शिक्षा कार्यक्रम पनि सुरु भइसकेको छ। आइतबार रुपन्देहीमा जिल्लाका १६ वटै स्थानीय तहका निर्बाचन अधिकृतसँग बैठक भएको थियो।
बैठकले १२ गते सबै तहमा निर्बाचन अधिकृतको कार्यालय खोली काम सुरु गर्ने निर्णय गरेको थियो। ‘निर्बाचनको मिती सरेपछि कार्यलय खोल्ने मिति पनि सर्न सक्छ, केन्द्रको निर्णय पर्खेका छौँ’ जिल्ला निर्बाचन अधिकारी होमनाथ गौतमले भने।
निर्वाचन सरेपछि बुटवलका उम्मेद्वार र मतदाता अन्योलमा
