स्थानीय निर्वाचनका लागि काँग्रेसले बनायो यस्तो नारा

बागलुङ, १० बैशाख – नेपाली काँग्रेसले आइतबारबाट स्थानीय चुनावका लागि औपचारिक प्रचार–प्रसारको आरम्भ गरेको छ। आइतबार आफ्नो फेसबुक पेजमार्फत प्रचार–प्रसारका सामग्री पोस्ट गर्दै औपचारिक प्रचार थालेको काँग्रेसले जनाएको छ।
प्रचार–प्रसार उपसमितिले पार्टीको झण्डामा ‘सबै अटने देश, सबैलाई जोड्ने काँग्रेस’लाई मूल नाराका रुपमा समावेश गरी तयार गरिएको प्रचार सामाग्री फेसबुक र ट्वीटरमार्फत सार्वजनिक गर्दै प्रचार–प्रसारको अरम्भ गरेको हो।
केही दिनअघि समाजिक सञ्जालमार्फत आक्रमक रुपमा प्रचार प्रसार गर्ने बताएको उपसमितिले त्यसलगत्तै आफ्नो कार्य आरम्भ गरेको थियो। समितिले काँग्रेसको हालसालै भेरिफाइ गरिएको फेसबुक पेजलाई नै आधिकारिक पेज बनाउँदै त्यसैका माध्यमबाट आम कार्यकर्ता र जनतामा आफ्ना प्रचार सामग्री लैजाने बताएको छ।
उपसमितिका सहसंयोजक केनद्रीय सदस्य तथा स्वास्थ्य मन्त्री गगनकुमार थापाले नयाँ प्रचार सामग्री पार्टी सभापति शेरबहादुर देउवादेखि सबै नेता कार्यकर्ताहरुलाई आफूले प्रयोग गर्न सामाजिक सञ्जालमा राख्न लगाउने बताए।
उपसमितिले वैशाख १० गतेबाट आफ्ना सबै कार्यदल र मिडिया सेन्टरलाई पनि सक्रियताका साथ प्रचारमा परिचालन गरेको छ। यसका लागि पार्टीको मिडिया सेन्टर पनि १० गतेबाटै पूर्ण रुपमा परिचालन भएको छ। १० गतेबाट पार्टीका नेताहरु तथा व्यवसायिक व्यक्तिहरु पनि पार्टीका धारणाहरु राख्नको लागि परिचालिन हुने भएका छन् ।
काँग्रेसको फेसबुक पेज भेरिफाइ
नेपाली काँग्रेसको नाममा विभिन्न व्यक्तिले फेसबुक पेज र समूह चलाइरहँदा काँग्रेसको आधिकारीक धारणा पाउने कुरामा भइरहेको अन्यौल हटाउन काँग्रेसले आफ्नो फेसबुक पेजलाई भेरिफाइ गराएको छ। नेपालमा केही राजनीतिक व्यक्ति र सेलिब्रेटीहरुको मात्र फेसबुक पेज भेरिफाइ भएकोमा पार्टीको हैसियतमा काँग्रेसको पेज पहिलोपटक भेरिफाइ भएको हो ।
हाल काँग्रेसको पेज करिव २५ हजारले मात्र लाइक गरेका छन्। स्थानीय तहको चुनावी अभियानकै क्रममा ५ लाखसम्म लाइक पुर्‍याउने लक्ष्य उपसमितिले राखेको सहसंयोजक थापाले बताए । यसलाई आगामी दिनमा पार्टी सहभागि हुने चुनाव तथा जनतासँग प्रत्यक्ष रुपमा जोड्ने पार्टीका गतिविधीहरुलाई शेयर गर्ने साधनको रुपमा प्रयोग गर्ने उनले बताए । काँग्रेसलाई जनताको बीचमा अन्तरक्रिया गर्न पनि यसले सहज हुने प्रचार उपसमितिको विश्वास छ ।