७४४ क्षेत्रमै सभा गर्ने माओवादी केन्द्रको निर्णय

काठमाडौं, १ बैशाख – सत्तारुढ दल नेकपा माओवादी केन्द्रले वैशाख नौ गतेभित्र स्थानीय चुनावका उम्मेदवार टुंगो लगाइसक्ने भएको छ। ७४४ वटै स्थानीय तहका निर्वाचन केन्द्रहरुमा ९ गते नै चुनावी सभा गर्ने पनि माओवादीले निर्णय गरेको छ।
स्थानीय चुनावबारे छलफल गर्न शुक्रबार प्रधानमन्त्री निवास बालुवाटारमा बसेको माओवादी केन्द्रको बैठकले वैशाख ३१ गते नै स्थानीय चुनाव गर्ने र त्यसका लागि पार्टीको चुनावी कार्यक्रम प्रभावकारी बनाउने निर्णय गरेको हो।
गाउँपालिका र नगरपालिकाका उम्मेदवार टुंगो लगाउनका लागि सम्बन्धित कमिटीलाई नै जिम्मा दिइएको माओवादी केन्द्रीय कार्यालय सदस्य लोकेन्द्र विष्टले बताए। सकेसम्म सर्वसम्मत र नभए बहुमतका आधारमा उम्मेदवार टुंगो लगाइने भएको छ।
‘उम्मेदवारबारे निर्णय गर्ने अधिकार सम्बन्धित कमिटीलाई नै दिइएको छ,’ विष्टले भने, ‘उमेदवारका चयनको जिम्मा प्रदेश इन्चार्जलाई दिइएको छ।’
माओवादीले मधेशी मोर्चालाई वार्ता र सहमतिका माध्यमवाट समस्या समाधानका लागि अपिल गरेको छ। कार्यालय बैठकले मोर्चालाई वार्ता र सहमतिका माध्यमवाट समस्या समाधान गरी स्थानीय तहको निर्वाचनमा सहभागी बन्न आग्रह गरेको पुनले बताए।
बैठकले मधेशी मोर्चासँग निरन्तर वार्ता गरी चुनावमा सहभागी हुने वातावरण तयार पार्न सरकारलाई आग्रह गरेको हो। बैठकले पार्टीको नारा ‘माओवादी केन्द्रको उपहार, गाउँ/नगरमा सिंहदरबार’ बनाएको छ।