अमेरिकाले अफगानीस्तानमा खसाल्यो १० हजार केजीको बम

बागलुङ, १ बैशाख – अमेरिकी सेनाले अफगानीस्तानको नंगरहर राज्यमा शक्तिशाली बम खसालेको छ । आतंकवादी संगठन इस्लामिक स्टेटविरुद्ध बिहीबार खसालिएको मदर अफ अल बम्स नामक यो बम १० हजार केजीको छ ।
अचीन क्षेत्रमा इस्लामिक स्टेटले सञ्चालन गरेको भनिएको सुरुङ नेटवर्क ध्वस्त बनाउन बम खसालिएको दाबी गरिएको छ । अफगानी रक्षा मन्त्रालयका अनुसार आक्रमणमा परी ३६ इस्लामिक स्टेटका लडाकु मारिएका छन् ।
९ मिटर लामो र १० हजार किलोको बम एमसी–१३० बिमानबाट खसालिएको थियो र भुइँ छुनु केही अघि पड्काइएको थियो । बमलाई प्रभावकारी बनाउन यसको आवरणमा आल्मुनियम राखिएको छ । यो बम भूमिगत संरचनाहरु ध्वस्त बनाउन निर्माण गरिएको हो ।
इराक युद्धको लागि तयार पारिएको यो बमको लागत मूल्य मात्रै १६ मिलियन डलर छ । सन् २००३ मा परीक्षण गरिए पनि यो प्रयोग गरिएको भने पहिलो पटक हो । रुसले पनि यस्तै खालको बम बनाएको छ जसको नाम फादर अफ अल बम्स राखिएको छ । बीबीसी