कृषि उपज निकासीबाट म्याग्दीमा ३३ करोड भित्रियो

म्याग्दी, १४ भदौ – जिल्लामा कृषि उपज निकासीबाट एक वर्षको अवधिमा तेत्तिस करोड रुपैया भन्दा बढी नगद भित्रीएको छ । गत आर्थिक वर्ष २०७२ र ७३ मा म्याग्दीका कृषकले आठ हजार १ सय ५९ मेट्रिक्टन कृषि उपज निकासी गरेर ३३ करोड ४६ लाख ४५ हजार रुपैयाँ नगद भित्राएको हो ।
जिल्ला कृषि विकास कार्यालयका अनुसार राम्चे, हिस्तान, शिख, घार लगायतका गाविसमा उत्पादन भएको १९ करोड ३९ लाख छ हजार रुपैया बराबरको चार हजार ७ सय १८ मेट्रिक्टन आलु निकासी भएको छ ।
बास्कुना, मरेक, बरंजा, देविस्थान, बिम, दोसल्ले, घार, भुरुङ तातोपानी, नारच्याङ, दानाबाट छ करोड ७२ लाख २ सय ५ रुपैया बराबरको एक हजार ५ सय १ मेट्रिक्टन सुन्तला निकासी भएको छ ।
यसैगरी रत्नेचौर, घतान, सिंगा, राम्चे, हिस्तान लगायतका ठाउँमा उत्पादीत सात करोड ३५ लाख ३४ हजार रुपैया मूल्यको एक हजार ९ सय ४१ मेट्रिक्टन तरकारी निकासी भएको हो ।
गोलभेडा, बन्दा, काउली, काँक्रो, घिरौला, भन्टा, खुर्सानी, सिमी, मुला, साग, धनीया, बोडी लगायतका तरकारी निकासी हुने गरेको छ । म्याग्दीबाट पर्वत, बागलुङ, चितवन, काठमाडौ, मुस्ताङ र पोखरामा कृषि उपज निकासी हुने गरेको कार्यालयका योजना अधिकृत ज्योती क्षेत्रीले जानकारी दिए ।
गत आवमा जिल्लाभित्रको बजारमा ४६ करोड ५८ लाख ८२ हजार रुपैया मूल्य बराबरको ११ हजार ६ सय ६० मेट्रिक्टन सुन्तला, तरकारी, अदूवा, कफि, केरा, मह, आलु, माछा र च्याउको ब्यापार भएको छ ।
अघिल्लो आर्थिक वर्ष २०७१÷७२ मा ४५ करोड ६३ लाख २४ हजार बराबरको कृषि उपज जिल्लाभित्रै खपत भएको थियो । यसैगरी २५ करोड २८ लाख ७० हजार रुपैया बराबरको कृषि उपज निकासी भएको थियो ।
ब्यवसायीक खेती विस्तारको क्रमसंगै रोजगारी सिर्जना, उत्पादन वृद्धी, आयात प्रतिस्थापन र कृषकहरुको आर्थिक स्तरमा पनि सुधार आएको छ । रत्नेचौरका कृषक निरबहादुर थापाले गोलभेडा बिक्री गरेर सिजनमा एकै दिन १८ हजार रुपैयाँसम्म आम्दानी भएको बताए । ‘बजारको माग र आवश्यकता पहिचान गरेर उत्पादन गर्न सकेमा तरकारीले राम्रो बजार र मूल्य पाउँछ’ थापाले भने ।
म्याग्दीको दुई हजार ८ सय ६६ हेक्टर क्षेत्रफलमा विभिन्न १२ प्रजातीका ब्यवसायीक बाली खेती हुने गरेको छ । गत वर्ष उत्पादीत २७ हजार ८ सय ३९ मेट्रिक्टन कृषि उपज मध्य १९ हजार २ सय ४४ मेट्रिक्टन मात्र बिक्री वितरण भएको हो ।
ब्यवसायीक बाली उत्पादन र बजारीकरणबाट म्याग्दीमा एक हजार ३ सय ३ जनाले नियमित र ३० हजार ५२३ जनाले मौसमी रोजगारी पाएका छन् । ग्रामिण बस्तीहरुमा सडक विस्तारसंगै यातायातको सुबिधा र बजारमा पहुँच बढेपछि कृषि उपजले बजार पाएको छ ।
यसअघि स्थानीय बजार र घरायसी उपभोगमै सिमित म्याग्दीको सुन्तला र आलु पछिल्लो केही वर्ष देखि जिल्ला बाहिर निकासी हुन थालेको हो । म्याग्दीलाई तरकारीमा आत्मनिर्भर बनाउने, आलु र सुन्तला खेती विस्तार एवं बजार प्रर्वद्धनमा प्राथमिकता दिइएको बरिष्ठ कृषि विकास अधिकृत श्यामप्रसाद रिजालले बताए ।
म्याग्दीमा वार्षिक १३ हजार मेट्रिक्टन तरकारी खपत हुने गर्छ । ८ सय ८५ हेक्टर क्षेत्रफलमा गरिएको ब्यवसायीक तरकारी खेतीबाट नौ हजार २ सय ७८ मेट्रिक्टन उत्पादन हुन्छ ।
एक लाख १३ हजार जनसंख्या रहेको यस जिल्लामा करिब पाँच हजार मेट्रिक्टन बाहिरी जिल्लाबाट आयात हुने गरेको देखिन्छ । जिल्लाको उत्पादनले नपुगेको अवस्थामा पर्वत, बागलुङ, चितवन, धादीङ सहित तराईका जिल्ला र भारतबाट तरकारी आयात हुने गर्छ ।
कृषकहरुको ब्यवसायीक तरकारी खेतीतर्फ आकर्षण बढेको र खेती विस्तार भएकाले उत्पादन वृद्धीसंगै तरकारी आयात घट्दै गएको बरिष्ठ कृषि विकास अधिकृत रिजालले बताए । उनका अनुसार, म्याग्दीमा तरकारी र सुन्तला खेतीको थप विकासका लागि बल्क आयोजना सञ्चालन गर्ने तयारी भएको छ ।