घाँस उत्पादन क्षेत्र स्थापना गरिने

बागलुङ, ७ भदौं – जिल्ला पशु विकास कार्यालयले बागलुङले जिल्लामा पहिलोपटक घाँस उत्पादन श्रोत केन्द्र स्थापना गर्ने भएको छ । आर्थिक बर्ष २०७३/७४ का लागि आएको कार्यक्रममार्फत घाँस उत्पादन गर्न सकिने पकेट क्षेत्र छनौट गरेर कार्यक्रम संचालन गर्ने पशु विकास अधिकृत डा.सुवास चौधरीले बताए ।
त्यसका लागि विशेष बैठक बसेर केही समयमा क्षेत्र छनौट गर्ने कार्यक्रम रहेको उनले बताए । त्यसका लागि छनौट भएको क्षेत्रका किसानको एक समिति गठन पूँजिगत अनुदान दिने व्यवस्था छ । चालु आर्थिक बर्षका लागि सरकारले ५ लाख २४ हजार रुपैयाँ अनुदान दिने गरी श्रोत केन्द्र स्थापनाको कार्यक्रम पठाएको हो । उक्त क्षेत्र कहाँ स्थापना गर्ने भन्ने जिल्ला स्तरीय बैठकले छनौट गर्नेछ ।
जिल्लामा पशु विकासका विभिन्न कार्यक्रम संचालन भएपनि घाँस उत्पादनको विशेष कार्यक्रम थिएन । कार्यालयमा युवा लक्षितकालागिचालु बर्षका लागि४ वटा कार्यक्रम छन् । जसका लागि केन्द्रीय रुपमै प्रस्ताव आब्हान भैसकेको छ । जस अनुसार बंगुरका लागि १ लाख अनुदान दिने व्यवस्था छ ।
त्यस्तै गाईभैसी पालनका लागि १ लाख ७० हजार अनुदान दिने व्यवस्था छ । उक्त अनुदान पाउनका लागि तोकिएका मापदण्ड पालना गर्नुपर्ने निर्देशिकामा उल्लेख छ । त्यस्तै सहकारी खेती कार्यक्रम अन्र्तगत चालु बर्षका लागि बंगुर र कुखुरा पालन कार्यक्रम स्विकृत भएको छ ।उक्त कार्यक्रमका लागि बंगुरतर्फ ८ लाख ३० हजार र कुखुरातर्फ ५ लाख ५ हजार रुपैयाँ अनुदानको व्यवस्था छ ।
जिल्ला पशु विकास कार्यालयले चालु बर्षदेखि जिल्लालाइ अण्डा उत्पादनमा समेत आत्मनिर्भर बनाउने योजना अगाडि सारेको छ । यस अघि जिल्ला दूध उत्पादनमा आत्मनिर्भर भएको छ । उत्पादनको हिसावले आत्म निर्भर भैसकेपनि व्यवस्थापन गर्न नसक्दा सुख्खा मौषम र चाडपर्वमा अहिले पनि दूधको अभाव हुने गरेको छ ।
जिल्लामा बार्षिक २४ हजार ४ सय ९० मेट्रिकटन दूध उत्पादन हुँदै आएको छ । कार्यालयका अनुसार एक व्यक्तिलाइ बार्षिक ९१ लिटर दूध भए पुग्ने राष्ट्रिय लक्ष छ । किसान र व्यवसायीले पिउन पुगेपछि मिठाइ र अन्य परिकार बनाउन समेत पुग्ने गरेको बरिष्ठ पशु विकास अधिकृत डा. गोपाल गिरीले बताए । अघिल्लो आर्थिक बर्ष पनि कार्यालयले ९८ प्रतिशत वित्तिय प्रगती गरेको थियो ।
पशु विकास, डेरी तथा आनुवंसिक श्रोत संरक्षण अन्र्तगत लिमे र पाराकोटे भैसी संरक्षण अभियान संचालन गरेको थियो । त्यस्तै पशु विकास सेवा कायृक्रम अन्र्तगत गाइभैसी र बाख्रा उत्पादनमा शतप्रतिशत उपलब्धी गरेको हो ।
कार्यालयले पशु आहारा विकास कार्यक्रम, पशु नस्ल सुधार, पाडा हुर्काउने कार्यक्रम, सहकारी खेती, पशु स्वासथ्य सेवा समेतमा ३५ करोड ४४ लाख रुपैयाँ बजेटमा ३४ करोड ४९ लाख रुपैयाँ खर्च गरेको हो । यसै विच गत साउन १० गतेको बाढी पहिरोमा परेर बगेको बुर्तिवाङको एक बंगुर फर्मलाइ दैविप्रकोप उद्धार समिति मार्फत सिफारिस भइ राहतका लागि माग भएको छ । बुर्तिवाङमा ३० वटा बंगुर रहेको एक फर्म बाढीले बगाएको थियो ।