टेलर पुगिन् २७ बर्ष

अमेरिकी गायिका टेलर स्विफ्ट मंगलबार २७ की भइन् । उमेर सानै हो, यो बेलासम्म उनले पाएको उपलब्धि भने चानचुने छैन । कन्ट्री र पप गायनमा कहलिएकी उनी कति स्थापित भइसकेकी छन् भने, सबैजसो म्युजिक अवार्ड पाइसकेकी छन् ।
सन् २००४ देखि सांगीतिक क्षितिजमा देखिएकी टेलरले ग्रामी अवार्ड मात्रै दस वटा पाइसकेकी छन् । संगीत क्षेत्रको नोबेल पुरस्कार मानिने ग्रामी दस–दस चोटि पाउनु सानो कुरो होइन । २०१६ मा मात्रै तीनवटा ग्रामी जितिन् उनले । एकेडेमी अफ कन्ट्री म्युजिक अवार्ड, अमेरिकन कन्ट्री अवार्ड, अमेरिकन म्युजिक अवार्ड, बीबीसी म्युजिक अवार्ड, बिलबोर्ड अवार्ड पनि उनको खातामा परिसकेका छन् ।
बीएमआई अवार्ड त उनले २००७ देखि २०१४ सम्म चौंतीसवटा हात पारिसकेकी छन् । त्यस्तै, ब्रिट अवार्ड, एम्मी अवार्ड, एमटीभी अवार्ड, पिपल्स च्वाइस अवार्ड, टिन च्वाइस अवार्डजस्ता नाम चलेका सम्मान पनि उनले पाइसकेकी छन् । अर्थात्, संगीतमा उनले पाउनलाई एक हिसाबले कुनै अवार्ड बाँकी छैन ।
टेलर प्रेमसम्बन्धी गाइँगुइँका मामिलामा पनि संगीतमा जति नै भाग्यमानी छिन् । उनी गायिकासँगै गीतकार र अभिनेत्री पनि हुन् । सन् २०१२ मा उनी ज्याक इफ्रोनसँग ‘द लोर्‍याक्स’ मा देखिइन् । त्यो फिल्मको प्रचारप्रसारका क्रममा दुवै नजिकिए भनेर खुबै होहल्ला भयो । टीभी होस्ट एलेन डिजेनेरसले दुवै डेटिङमा रमाइरहेको भनेर सार्वजनिक गरिन् । तर, दुवैले यो अफवाह मात्रै रहेको ठोकुवा गरिरहे । यही वर्ष मात्रै उनको नाम बेन एफलेकसँग जोडियो ।
टेलर र इद सिरन लामो समयदेखि घनिष्ठ छन् । यो सम्बन्धले फ्यानहरूलाई उनीहरूबीच खिचडी पाकिरहेको छ भनेर अड्कल काट्नबाट रोक्न भने सकेको छैन ।